張智霖「露鳥」 師奶受驚掟菜

Chilam昨日一大早到石澳拍攝新劇《衝上雲霄II》，罕有地赤裸上身露兩點示人。劇情講述他在屋內沖涼時突然停水，只好用毛巾摟着下身出門搵救兵。恰巧當時一名師奶路過，Chilam欲借電話求救之際，毛巾忽然甩掉，「露鳥」人前，嚇得師奶大鬧「變態佬」又掟菜，認真倒楣！

為表達Chilam甩毛巾後「光脫脫」，導演要拍多個鏡頭，又盡量拉下Chilam的短褲褲頭，令Chilam有點避忌。

Chilam出動私伙性感女郎毛巾。

「露鳥」嚇師奶的Chilam被掟菜。

冇腹肌夠真實

問Chilam有否為今次的剝衫鏡頭而操fit？他笑言：「我就係特登唔去操！希望盡量唔好有六舊腹肌，咁樣會真實啲、人性啲。（大犧牲？）男人之家有乜所謂？女仔就話唔好啫，（露兩點喎！）成日都有啦，不過唔係鏡頭前，同個仔去游水都係咁。」

Chilam又表示曾在電影中僅穿底褲上陣，所以不會因此而感到尷尬，可能要全裸才會有「感覺」，但遇到好導演、好劇本、好對手，都不介意全裸拍攝。

與杏兒肉帛相見

及至下午，胡杏兒與吳卓羲加入拍攝另一場戲，記者說杏兒「走寶」，錯過Chilam的兩點，她笑言：「我見過啦！之前喺《魚躍在花見》有一場戲講我同佢分別扮小龍女同楊過，要肉帛相見添！」

文：影視組