Ben忠告：太窮必當DJ
新城DJ Ben（杜浚斌）跟年輕十載的三位新秀DJ拍檔主持新節目外，早前更推出「打工天書」為求職人士探路，資深廣播人Ben對有志投身DJ界的後輩忠告是：「若你太窮，請別當DJ。」一針見血地道出做DJ背後的辛酸。
由Ben、妹頭，Bingo及James合作推出的新書《蕉職Junior》，四位親身考察各行各業，任職廣播界14年的Ben在書中更提到：「若你太窮，請別當DJ。」問他是否言過其實？他謂：「我冇誇大，我會勸年輕人，如果真係有家庭負擔，都唔好做DJ，佢哋啲人工，可能只達到最低工資，因為新入行啲DJ要邊學邊做，時間好長。」
而入行未到一年的妹頭坦言：「我試過有九個月冇人工。」至於Bingo及James亦言試過在電台實習，有逾年沒有人工。
月前重組
另外，由Ben、Bob（林盛斌）及Ricky（范振鋒）主持長達九年的香蕉俱樂部，為配合電台節目改革，月前終告重組，現改為Ben做膽，再加三位生力軍DJ，包括妹頭、Bingo及James，節目並改名為「香蕉俱樂部Junior」。Ben表示：「我、Bob同Ricky依家分上中下時段做節目，我就係負責守晚上嘅尾門節目，雖然同佢哋分開，但都無話唔捨得，因為喺電台都會見到面。」
手忙腳亂
問Ben帶住三位新人可感吃力？他謂除跟妹頭年紀相隔12年感到「好大鑊」外，另一難題是為令節目更貼近年輕群，妹頭開了facebook方便和觀眾在網上互動，Ben呻說：「我以前唔玩呢啲嘢，依家又要講又要聽，又要播歌，家陣仲要上埋facebook，真係手忙腳亂。」不過Ben大讚年輕人令節目有新火花。
文：音樂組