祖兒龍情蜜意：啱就要堅持
樂壇天后容祖兒前晚率領師弟妹舉行音樂會，祖兒獻唱時有感而發，表示只要認為是對的事就要堅持，令人聯想她與劉浩龍不被看好的戀情，似向男友派定心丸！提到老闆楊受成願開戲予她及劉浩龍合作，她謂寧與影帝或陳奕迅合作。
祖兒前晚與林峯、陳偉霆及林欣彤開騷，獻唱《霧裡看花》時感慨表示：「首歌話只要自己喜歡，就唔好理其他人，呢個係我30歲後嘅體會，只要啱就要堅持。」令人聯想她與劉浩龍（師兄）不被看好的戀情，她於訪問中解釋：「人生係一個旅程，想試就當歷險，套用喺感情同其他方面都管用。」又自言30歲前如扯線公仔：「依家要為自己着想，但我會有分寸。」有指老闆楊受成會開戲給她與師兄合作？她說：「佢開先算，我係票房毒藥，要搵影帝合作平衡番。」她又謂講到票房毒藥不得不提陳奕迅：「佢認第二，冇人敢認第一，如果佢肯嘅，下年我哋就會合作拍戲，實行負負得正，以毒攻毒！」
林峯唔識馬愛媛
而內地女歌手馬愛媛於微博暗指林峯是爛片及花心影帝，林峯聞言即黑面表示：「首先唔好玩我，唔好咩都賴落我度，我都想係影帝。我冇聽過佢個名，但有看過報道，（可覺得無辜？）我覺得唔需要再講，我唔識佢。」至於有指無綫「一人一票」選視帝視后？他即大表贊成。問到如樂壇也用同一方式時可有信心？他說：「獎項並不重要，（是否較擔心公司伺服器？）都係喎，我都驚，但相信會做好檢查，從錯誤中學習。」
林欣彤唱到落淚
曾受失聲困擾的林欣彤（Mag），患病後首度獻唱，更於台上兩度感觸落淚，並言仍可唱歌時便會拚下去。受訪時變回「雞仔聲」的Mag，坦言仍未康復：「如果今次可以做到，可以鼓勵我快啲好番，唱完今次就會休息。」
文：音樂組