張衞健：被欺負要據理力爭
蘇永康不滿物業放租變放盤，好兄弟張衞健（Dicky）與梁漢文（Edmond）都力撐他有理。Dicky在微博留言：「支持我的好朋友，若被欺負，肯定要據理力爭。」並呼籲網民轉發該條微博。他接受電話訪問時說：「蘇康一向肯包容別人，佢嬲係對方做錯咗，帶咗麻煩畀佢，但又唔肯更正。任何行業誠信好緊要，係人都有錯，錯咗唔更正咁冇誠意，阿康嬲係應該。有其他地產公司都打畀阿康媽咪話想登相宣傳，但佢婉拒，人哋都冇做到，呢啲就係操守。」
Edmond亦在電話中力撐：「知道蘇康層樓係放租而唔係賣，如果未經過佢同意，攞咗去做其他嘢，已經唔係幾啱同唔合理，睇吓可唔可以再傾啦。」他承認早已聽對方提及事件：「之前有同我講過，我諗佢係得唔到要嘅答案同合理解釋，作為兄弟梗係要支持佢啦。」