蘇永康1,500萬物業被睇全相 扯火追究

蘇永康近日為私隱專員公署趕拍《私隱何價》劇集,不料人生如戲,有地產代理涉嫌侵犯其私隱,在未得同意下,公開其物業內櫳相片大賣廣告,「全相」被公開,原本只想將物業放租,亦被寫成有意出售,嬲爆的蘇康決定訴諸法律要求有關方面更正及公開道歉。

蘇康昨日在微博炮轟利嘉閣地產代理有侵犯私隱之嫌,他寫道:「未經我同意把我名下一個物業,全間屋刊登,本來我希望能大事化小,經一星期交涉後我發現他們完全無誠意解決問題,最令我氣憤的是他們企圖因(以)一個大話襟(冚)一個大話的方法矇(蒙)混過關,今早我已交由律師處理,我還是相信香港的法律。」

鄭重聲明嚴禁拍照

蘇康接受電話訪問時詳細交代事件經過,他指6月時透過3間地產代理,將多年前以1,500萬購入薄扶林碧瑤灣逾1,500呎物業,以每月6萬元放租,事前已向各地產代理鄭重聲明嚴禁拍攝有關單位內的照片以保私隱。不過約2周前,蘇媽媽看見兒子的物業相片在某地產刊物全面曝光,他說:「好詳盡,由客廳、睡房、工人房,甚至單位外景觀嘅相全部都有,仲話我係1,800萬放盤,寫明代理行係利嘉閣,真係錯得離譜!」

蘇康曾兩度聯絡地產經紀作了解,並要求作出「只租不賣」的更正及道歉聲明,可惜卻遭極不尊重及欠誠意的對待:「佢(經紀)初時話肯喺一星期後出聲明,結果梗係冇啦!我咪再打畀佢囉,點知佢話佢公司唔會開先河出聲明喎!我覺得佢係大話冚大話囉,畀我覺得係佢當我流囉!」由於他氣憤難平及要捍衞私隱權,故昨日已透過律師發出律師信予地產代理,指有關方面作錯誤引導及侵犯其私隱。

問為何覺得懷疑被某人偷拍物業?蘇康直言:「呢個好明顯啦!」他稱多年前另一物業被雜誌狗仔扮租客偷拍後大做新聞,令他見過鬼都怕黑!他謂:「本雜誌寫到我間屋好衰,話唔係豪裝,寫到好衰!」自此,蘇康為免再被人大做文章,故有租客睇樓時必安排工人「𥄫實」及不准拍攝。現為私隱專員公署拍劇的他,竟被侵犯私隱之嫌,可感諷刺?他哈哈笑:「我覺得好好笑囉!」

「你估我屎忽痕咩?」

蘇康強調其訴求很簡單:「只係佢哋肯登更正、道歉聲明,就算登到『丁屎』咁細格,我都接受。(要求賠錢?)唔會,唔係講我好多錢,老實講可以賠到幾多吖!」他自言不是無事生非的人,要透過法律解決問題亦感煩惱:「唔係話嘥錢打官司,但我真係好激氣又好煩,我搵咗曾幫謝霆鋒打官司嘅法律朋友幫手,我都怕煩到人,想息事寧人,你估我屎忽痕鍾意打官司咩?唯一令我開心嘅係,有好多朋友幫我轉發微博,真係好多人撐我。」

利嘉閣願作出道歉

昨日記者聯絡利嘉閣總裁廖偉強,他表示已通知職員,強調整件事是地產代理和刊物間溝通上出現錯誤,現了解事件當中。他得知業主不滿,已安排分區董事向蘇永康了解,初步感事態不算嚴重。廖偉強又指員工不會未經業主同意下而拍照,但若真的有員工疏忽,會作出道歉。

文:音樂組

第一手消息請下載on.cc東方互動iPhone/iPad/Android Apps