鄭少秋：阿姐都要忍我
風流倜儻的鄭少秋，合作花旦無數，令人印象深刻的有「螢幕情侶」汪明荃和「緋聞情人」趙雅芝。與兩女的「火花」，秋官記憶猶新，他口中最夾的汪明荃，已從1976年合作《書劍恩仇錄》開始結緣；合演《楚留香》而傳緋聞的趙雅芝，秋官則被指是由憐生愛，曾因緊張阿芝演出而「搞喊」她。
「人人話同阿姐（汪明荃）合作都好驚，你哋就話我先搞得掂阿姐，阿姐知我就得佢又錫佢，所以我哋合作得好開心。雖然佢係有啲執着，但佢係一個有理想嘅演員，對自己有要求啫！其實，有時阿姐都要忍我o架……」阿姐處理事情方法較為急，追求直線，我哋合作時，都曾因理念不同而爭拗，我個人比較柔，阿姐發火時，我都有招數化解。
好似舊年同阿姐開演唱會，佢嬲座位分布唔平均，知唔關我事所以都冇嬲過我！其實我哋識咗幾十年，阿姐都了解我個性，鍾意照顧人又冇壞心腸，阿姐都曾經同我講，同我合作好放心。
至於同阿芝合作，第一套係《大亨》，嗰時佢剛選完港姐第一次拍劇，而我當年又想演好部戲，我承認逼得阿芝好緊，為咗想Keep住自己地位及成就，咪變得緊張咗！記得阿芝有場戲係佢唯一可以有表現，旁人都希望佢好，但佢又做唔到，我又心急，提佢要把握，最後我仲逼到佢喊咗出嚟……事後佢有冇嬲我？我感覺到佢同我冇咁Friend囉！可能有啲唔接受，但又未去到怪我嘅，我估佢心諗：「唔使咁啫！」
雯女嚇到喊
除咗阿姐同阿芝外，我都好欣賞李司棋，佢嘅戲及演員修養都幾好。至於鄧萃雯，依家佢就係視后，但當年我哋合作，雯女都有喊嘅！我最記得1989年合作劇《決戰皇城》，雯女好驚騎馬，但又要拍一場騎馬戲，佢唔敢跑，後來我覺得唔得……武指就打隻馬個屁股，咁就跑咗去啦！之後雯女返嚟，嚇到佢喊囉……但我要澄清，呢次唔關我事！」
口述：鄭少秋
筆錄：影視組
攝：劉志源
場地：Bella Vita
服裝：BOSS Black