何嘉莉誕6磅7囝囝 老公剪臍帶
前英皇小花何嘉莉（Lillian）前日榮升母親，開刀誕下囝囝Jean，由老公陪入產房兼剪臍帶，Lillian稱讚囝囝人仔細細已表情多多，非常生鬼，而她昨日亦急不及待在微博將喜訊及囝囝的可愛樣公布天下。
何嘉莉前日在嘉諾撒醫院開刀誕下6磅7兒子，昨日她在微博公布喜訊：「寶寶昨天出生了！重6磅7哩感恩感恩。」並上載了一張BB的照片，與眾分享喜悅。
取英文名字Jean
首次做母親的Lillian坦言心情十分興奮：「老公（黃逸璋）同我都覺得好唔真實，老公有陪我入產房，仲剪臍帶。屋企人超興奮，因為第一個男孫。（擇日子開刀？）日子係自己定，但冇特別擇日子。（餵人奶？）未決定，因為依家仲好攰，傷口仲痛緊。」她透露已為囝囝取了英文名，叫Jean，問到囝囝樣子像誰？她稱：「鼻同嘴都似老公，眼睛未知似邊個，因為BB啱啱出世，相信遲啲個樣會再變得明顯啲、精緻啲。」她笑言現時BB已經表情多多，非常生鬼。
設計一家三口服
Lillian的生意拍檔兼好友陳柏熹（Harris）昨日亦有到醫院探望她，並帶了一袋BB衫作禮物，他說：「我仲會設計一家三口嘅家庭服畀佢哋，遲啲再送薑梘畀Lillian沖涼。」Harris大讚BB得意：「面形似Lillian，個鼻好靚，手長腳長。Lillian都幾精神，身形亦冇乜變化，好似陳慧琳咁得天獨厚。」他稱認咗Jean做契仔，笑言自己想做契哥，但無奈媽咪不想做契媽，要做契嫲，他惟有由契哥變成契爺。
文：名人組