張名雅：一人一票朱千雪會贏
今年香港小姐大玩噱頭一人一票選港姐，可惜決賽夜冧server被全城狂插淪市民笑柄，令40周年港姐競選留下污點。冠軍張名雅、亞軍黃心穎、季軍朱千雪坦言以為當晚司儀公布冧server是講笑。根據網民反應及坊間意見，認為若由市民投票，朱千雪會奪得后冠。張名雅亦承認如果一人一票，朱千雪很大機會贏。
張=張名雅 黃= 黃心穎 朱= 朱千雪
黃：近來都睇到報道因為冧Server事件質疑我哋三甲名次。
張：其實TVB一人一票選港姐係好創新，公司係有心去嘗試，可惜最後失敗咗，只可以講冇辦法，惟有接受專業評判揀出嚟嘅冠亞季軍。其實每年港姐冠軍都有人唔鍾意，自己有時都會唔開心，但係最驚係千雪同心穎介意唔開心！不過之後同佢哋傾過，知佢哋冇唔開心，咁先放心。講真，投票真係好難講，都有可能係千雪攞冠軍，或者係心穎都唔定。
黃：其實唔能夠一人一票係有啲遺憾，因為永遠都留低一個問號，但係都係一種遺憾美，希望下年可以做到一人一票。我聽到外間質疑我攞亞軍，但係自己唔會咁諗，因為覺得自己決賽表現幾好，工作人員評語都讚我。依家唔會再諗邊個係冠軍、亞軍、季軍，因為諗嚟都冇用，三個女仔各有長處，張名雅攞冠軍係佢應該得到嘅。
唔會瞓唔着
朱：雖然選出嚟係有冠亞季軍分別，但係我覺得我哋冠亞季軍好似三位一體，所以由頭到尾都冇好差嘅感覺，所以唔會話覺得唔公平同唔開心。自己入到三甲已經冇遺憾，自己做到最好，個電腦系統又唔係我哋整嘅，所以冇遺憾。
張：其實歷屆好多港姐三甲都有人會質疑，因為每個人都有自己嘅心水。當選之後自己微博一晚多咗五千fans，所以真係各有所好，自己都冇因為報道困擾瞓唔着。
朱：哈哈，我哋三個一定唔會瞓唔着，食得瞓得。
無必要重選
張：大家點睇重選？
黃：都見facebook有人發起投票，大家都好關心今年嘅港姐，但係我覺得唔使重選。
朱：唔使重選，港姐呢個旅程去到8月26日已經結束，結果係張名雅攞冠軍。雖然好多人話我有機會攞冠軍，但係唔需要去諗一啲如果，有市民同fans認同，自己當贏咗。
張：有咗結果，都冇必要再去提，每年港姐都有人鍾意唔鍾意係正常反應，有人網上投票話千雪係冠軍，或者心穎冠軍，都未必代表到全部人嘅意見。
黃：冇錯，就算嗰晚千雪攞冠軍，都可能一樣有人講。
朱：我覺得可能啲人係嬲系統唔work，唔係覺得張名雅唔值得攞。
團結抗批評
張：其實嗰晚志偉、叻哥宣布冧server，由評判決定三甲，我以為係講笑，你哋呢？
黃：我都以為佢哋講笑，你知佢哋一向好幽默，冇諗過會有呢啲嘢發生，當時贏咗湯洛雯入三甲係全晚最開心嘅一刻，所以都未諗得切其他嘢。
朱：我都以為係講笑。
張：入到三甲都未開心完，嗰一刻仲發緊夢，之後先知道咁大件事，觀眾回響咁大。
朱：如果我哋三個互選唔知邊個輸贏呢？
黃：我會揀名雅，事實上佢參選以嚟表現都好穩定，我同千雪只係當晚表現好，所以覺得賽果合理。
朱：如果自己投票一定投自己，但係名雅當晚表現係好好，攞冠軍係實至名歸。
張：其實當晚唔知自己表現係點，之後睇番錄影帶覺得表現係比平時好，可以話超水準。自己平時其實幾騰雞，答問題係有啲驚，但嗰晚表現係幾淡定。不過，坦白講如果一人一票去選，千雪係好大機會贏，因為千雪畀人感覺親切，有時鍾意就係鍾意，冇得解釋。
朱：其實有今次經歷，我哋三個嘅感情都深厚咗。
黃：絕對係！因為好多嘢只係我哋三個一齊經歷過，出面嘅人唔會知。外人會覺得個個女仔一定想攞冠軍，其實唔係，有呢個結果已經好開心！
朱：有咗結果，依家唔會再諗係咪我可以攞冠軍。入到三甲喺後台一刻好難忘，見到大家嘅眼神都好滿足，有名次已足夠。傳媒、社會話要重選嘅聲音，反而令到大家更團結，希望大家向前看。
與偶像合作
張：我哋已經入咗行，大家有乜目標？
黃：自己對娛樂圈有興趣，可以嘅話乜都想試。
朱：我嘅目標係……
黃：你係想見林峯！
朱：冇錯，哈哈。自己一路都冇目標，選美係希望可以搵到自己嘅目標，好想試吓拍劇同做司儀。自己鍾意寫嘢，好想同人分享自己嘅睇法，有機會想出書做作家。
黃：我都鍾意林峯，名雅就鍾意陳展鵬。
張：我鍾意睇佢做戲，可能我鍾意四眼同正經啲嘅男仔。
黃：我係因為聽林峯喺《天涯俠醫》唱嘅主題曲《心呼吸》開始鍾意佢，但係第日如果有機會合作都驚怕醜不停NG。
後記：友誼第一
今年港姐三甲充滿爭議，負面新聞浪接浪，不過造就了張名雅、黃心穎和朱千雪的友情歲月。張名雅坦言最擔心是黃心穎和朱千雪因報道而不開心，朱千雪有感而發：「佢問過我哋有冇唔開心，其實冠軍佢已經攞咗，佢可以唔理我哋感受，真係好多謝佢。」張名雅聞言即忍不住哭泣，朱千雪和黃心穎亦感動得眼濕濕。誰說選美只有是非而沒友誼？
筆錄：影視組
攝：沈健程
服裝：Sinequanone 髮型：HAiR@Derek Cheung
場地：Three on Canton（港威酒店）