貝安琪靜待機會一打成名
童星出身的「星二代」貝安琪（Ankie），為進一步了解心愛的電影世界，不惜紆尊降貴做影棚打雜。不怕吃苦的她，現已確立以「打女」為終極目標，更積極操弗自己，注意飲食、勤做運動雙管齊下，靜待重錘出擊的機會，一打成名！
生於電影世家的貝安琪（Ankie），在七十年代女星兼導演母親劉香萍的薰陶下，自小就與電影結下不解緣，她說：「我六歲嗰陣，媽咪每日都帶我睇三套戲，大家都上晒癮！而且又成日跟媽咪去戲棚拍戲，好鍾意大家向同一目標努力嘅感覺。」
作為星二代，加入娛樂圈似乎理所當然，Ankie亦早於七歲便以童星身份拍電影，亦令她留下很多快樂回憶：「第一次拍戲嗰陣係我生日，當時所有工作人員都同我一齊慶祝，仲送咗Barbie公仔畀我！由嗰時開始，我就成日希望拍多啲戲。」
專心朝演員路邁進
小時候被一份小禮物沖昏頭腦，但經歲月洗禮，Ankie仍貫徹始終，朝演員路邁進。她曾做過演員、模特兒、電視助理、幕後工作人員、文職、侍應等工作，累積不少經驗：「我係個唔可以坐喺辦公室嘅人，因為實在太悶。做侍應雖然體力上係辛苦，不過可以同人交流，比較有趣。我試過做啤酒節女郎，每日都見到人飲酒飲到好開心、醉醺醺，不過有時啲醉客搞事或者打交，我就要打電話報警。」
Ankie自言很享受在戲棚內「一家人」的感覺，為更了解電影製作，她甚至做過幕後：「但真係好辛苦，唔單止要最早返、最遲走，又要管接管送，仲要幫人執頭執尾，買咖啡、派飯盒等，都係做演員舒服好多！」Ankie立志成為演員，其中一個原因是每次演出也能成為另一個人，做些超乎想像的事：「好似之前拍《絕色武器》，我要喺四樓跳落地下，雖然有威吔，但係都嚇到我魂飛魄散！」
與友行山享受生活
時時刻刻搵命博，但Ankie卻反而做上癮，望能「打」出名堂。她更為此而學習Kick boxing，自我裝備，同時每天勤做瑜伽，保持素食習慣，實行由內至外保養，力保最弗體態：「其實我食咗齋十九年，好多人都誤會食齋會營養不良，但其實係錯誤觀念。」她坦言茹素初期，外婆生怕她會影響發育，故擔心得流着淚叫她吃肉；最終她以行動說服外婆，並不時親自炮製素食大餐給家人品嘗，結果成功令母親及外婆都減少吃肉。她更獲環保組織Green Monday（綠色星期一）邀請出任大使，並向大眾推廣逢星期一放棄吃肉，希望以生命影響生命。
在德國長大的Ankie，從小就跟父親到森林探險，令她愛上欣賞大自然。至今她仍不時相約三五知己行山：「沿途同朋友睇吓風景、傾吓偈，可以平衡一下忙碌嘅都市生活。我哋一定要喺平日有足夠嘅休息，遇上機會，先可以發揮100%嘅水準！」
分享打扮心得
Ankie身為模特兒，平常有很多機會穿上不同的新裝行騷或出席各大小活動。她卻笑言私底下卻不太注重打扮，最愛穿Tee、牛仔褲配平底鞋，亦絕不追捧名牌。她認為穿衣之道最重要舒適，但亦有分享打扮心得：「平價衫褲配襯一啲有牌子嘅飾物、手袋或外套，睇上嚟就即刻升呢！只要識Mix and Match，要打扮得大方得體都唔使用好多錢。」另外，她亦鍾情於美國及紐約的二手服裝店，貪其款式較多、獨一無二，而且價錢較便宜。她續說：「喺舖頭裏面揀衫似足尋寶，搵到啱心水嘅衫真係好開心！」
自種新鮮食材
喜歡下廚的Ankie，最拿手煮西式餐湯、意粉及甜品，當中青醬意大利麵（Pasta with pesto）更是其圈外男友的至愛。但礙於有些西式香料在港很難找到，導致菜式不能盡善盡美，對煮食有堅持的她，竟從德國找來Basil種子在家中親自栽種！她笑言：「其實我之前種過幾次都失敗，唔知係因為天氣唔啱，定係因為我放得唔夠愛心落去。」皇天不負有心人，經多番嘗試，種子終茁壯成長。Ankie更愈種愈起勁，連小番茄也一同栽種，可隨時隨地品嘗最新鮮的食材。
採訪：龔凱欣
攝影：劉智源
服裝：ESCADA & ESCADA SPORT