Chilam新寵登場 幾百萬通街擺

愛車如命的張智霖(Chilam)近日又為車庫添置玩具,新車落地即駕駛價值350萬的平治SLS AMG開工!只見Chilam前晚拍畢新劇《衝上雲霄Ⅱ》取車時,竟把成間屋咁貴的戰車隨街泊,難怪連同劇的胡杏兒都話Chilam型!

Chilam前晚與胡杏兒在中環蘇豪區拍攝《衝Ⅱ》收工後,Chilam見記者等候他離開,遲遲未肯離開服裝車,直至接近凌晨兩點,為趕快回家見囝囝魔童而取車走人。原來Chilam將新買價值350萬的平治SLS AMG泊於路邊,新車白色流線型之餘,雙門從側翼打開,相當型仔。Chilam完全無懼愛車會被刮花的危險而當街停泊,真係吹佢唔脹,難怪Chilam取車後,路過的杏兒放聲大笑:「嘩!架車好型呀!」

抹汗照鏡 絕對貪靚

至於Chilam全晚心情輕鬆,未埋位時與杏兒有講有笑。因為天氣太熱,Chilam不時抹汗、補妝和梳頭,還對住塊鏡狂照不放,比杏兒還要貪靚。期間有外籍人士窩心送上春卷給劇組人員品嘗,Chilam和杏兒即連忙上前講多謝。

記者昨日致電Chilam,他表示前日連走幾組戲搞到感冒發燒:「好慘,燒到101度,醫生開咗4日假紙畀我,叫我多休息,但食完藥仲係有燒,老婆(袁詠儀)又返大陸做嘢,惟有自己照顧自己。唉!最慘係呢幾日主要拍我戲份,所以要爭取時間休息,希望聽日(今日)可以開工!」對於買新車一事,他即笑說:「唔講呢啲喇!」問是否生日禮物?Chilam說:「有人送畀我就好,你估人哋傻o架!」他又一笑帶過是否獎勵自己:「買好耐喇,唔講呢啲!」

文:專案組 攝:追蹤組