楊秀惠前度偷食戲如人生
楊秀惠拍劇多次扮演小三勾引男人，但現實中原來是受害者。她自爆以前有男友背她偷食，傷心欲絕，不停發噩夢，最後忍痛斬纜。無獨有偶，她於新劇的角色與過往慘痛遭遇相似，索性將當年怨恨代入角色。
無綫藝員楊秀惠過去多次演撬人牆腳的小三角色，但現實中卻是受害者。多年前她與一名花心男拍拖，卻背着她鬼混偷食，她坦言當時傷心到不停發噩夢。故她今次在劇集《造王者》演繹賢良淑德的「德妃」，面對丈夫有外遇，她特別容易代入角色。
秀惠說：「好耐以前試過男朋友偷食畀我發現咗，被愛人出賣係好難受！當時好歇斯底里，都試過畀機會男友希望大家可以繼續一齊，但係太傷心，瞓覺都不停發噩夢，最後忍痛提出分手。今次德妃畀人搶老公，自己直情將當時嘅怨恨放咗入戲裏面。」
入戲難抽身
劇中楊秀惠的角色經歷宮廷鬥爭，由賢慧中直轉變為充滿攻心計奸角。她說：「今次角色好悲情，又要被人陷害而小產，又有小三出現搶老公，同以往多數演嘅幸福角色唔同。戲入面我成日以淚洗面，好彩自己都係多愁善感，成日都會諗無謂嘢，好似天災人禍，所以都容易喊得出。但係有時都太入戲，返到屋企諗起都會喊，需要時間平復。」
感激黎耀祥
秀惠今次與視帝黎耀祥、影帝鄭則士有不少對手戲，拍攝時難免有壓力。她說：「可能我實在太緊張，開工佢哋都察覺到，黎耀祥、敖嘉年、黎諾懿成日夾埋整蠱我，氹我笑，幫我減壓，真係好多謝佢哋。」
文：影視組 攝：黎志輝
服裝：Pinky Girls
場地：Tasing Room
鞋：DYOS Avenues