鍾鎮濤：世界末日娶范姜

阿B相隔八年再推出國語專輯，整個暑假他身在台灣為新碟宣傳，歌曲《爸爸的話》和《你是個男人》更先後登上音樂流行榜的冠軍，成績理想。阿B笑謂：「知道好多唔同地方都攞到冠軍，自己都好奇怪，因為自己個名同新一輩好似林宥嘉、田馥甄（Hebe）嘅偶像歌手一齊出現喺流行榜。」

廿四孝老竇的阿B將功勞歸於愛女鍾懿，他笑謂：「好彩我同鍾懿合唱，我哋兩個年齡拉勻中位數係30歲，所以我、林宥嘉同Hebe都變成同輩歌手。」他自爆被鍾懿投訴新碟為何沒有她的照片，為滿足愛女要求，新版本將有鍾懿的閃卡附送。

范姜與鍾鎮濤拍拖多年感情穩定，儼如老夫老妻。（資料圖片）

鍾懿（左）與鍾幗經常上台獻唱，遺傳父親的表演欲。

工作密麻麻

鍾懿討人歡心，早前有上海富豪施建祥收她做契女大搞百萬上契宴，而該富豪與黎明（Leon）私交甚篤，故促成阿B與Leon合作。阿B謂：「有次我哋三個食飯傾偈，我冇諗新碟要香港推出，契爺提議既然Leon有唱片公司，不如就交畀Leon做啦。」

現時阿B工作排得滿滿，問明年能否實踐與范姜結婚？他笑言：「睇吓今年係咪世界末日先，冇事先至計劃未遲，我一路儲緊錢，要買粒大石頭（鑽石）同女友求婚。買石頭好，起碼世界末日時佢都可以戴住。」

不擔心銷量

阿B又稱不擔心唱片銷量：「以前年代就擔心賣得唔好，依家因為都冇人會賣得好，冇壓力即係做乜都贏。」新碟製作花200多萬，阿B沒想過靠賣碟賺錢，但承認多了中台兩地的商演機會。

文：音樂組

攝：李柏儒

場地：HABITU Ristorante the Garden