馬德鐘：鍾意揍仔落廚！

好多人都問我同老婆相處之道？其實我哋就係好普通嘅夫妻，大家事事溝通，尤其有個仔之後，相處方法就更加唔同以前只係二人世界！我同老婆一齊十八年，個仔今年都十四歲；好多人都唔知，我係好鍾意同個仔一齊做運動，例如潛水、游水、打籃球，又會拉吓小提琴咁，行街睇戲，個仔都好黐我o架，因為我太太就嚴厲啲；個仔讀國際學校，好少睇香港電視，亦唔識睇中文，但會睇我做嘅戲，我好想佢大個揸飛機，哈哈！其實我依家都仲想生個女，不過我太太就唔係咁想，因為佢事業都幾忙，佢喺香港大學做緊research，亦做好多公益事，佢做人處事嘅方式好值得我學習，最重要EQ好高！

包辦屋企維修

呢兩個月我比較得閒，多咗啲時間煮嘢食，我廚藝都唔錯o架，最拿手係煮西餐，白酒煮青口、焗田螺、意粉嗰啲都OK！我個仔成日叫我煮，所以我教工人等佢學識就可以煮畀阿仔食。其實我係一個可以好動又可以好靜嘅人，都幾多面化，屋企有咩維修都係我整，個仔就係我最好嘅男朋友，同佢出街嘅次數係同老婆幾倍；講都冇人信，如果我唔使開工，每日六點幾就起身車個仔返學，跟住就去做運動，然後等接佢放學；喺佢眼中一定信任我！

放大圖片	馬德鐘不時和阿仔一齊去做運動。

人仔好搵十倍

離開咗TVB我主力喺大陸工作，但如果有好嘢搵我都會返去，或者其他電視台搵我都可以考慮。人仔當然好搵，人工係以前十倍以上，但我最大嘅目標係可以拍到一套大陸電影。至於會唔會喺大陸買樓？暫時就唔諗住喇，始終個仔都喺香港讀書，好多嘢都喺香港。（完）

後記：

若非跟馬德鐘做訪問，一直都認為他如外間所言的花弗、玩世不恭；訪問期間，電話響起，原來他的司機致電詢問有關接載其兒子放學的事，他說這些事一直是由自己做，因要工作才吩咐司機代勞，藝人的背後，都是你我他的慈父！

口述：馬德鐘

筆錄：名人組

服裝：BOSS Black