鄭中基陪老婆隊啤歎雪茄
余思敏自從為鄭中基誕下愛女後，成功箍實老公，早前獲贈五千萬豪宅外，日前兩人更浪漫地撇低囡囡，於淺水灣望無敵海景飲啤酒、歎雪茄，相當寫意。
前有線女主播余思敏收服鄭中基，自從去年誕下愛女Emma後，向來吊兒郎當的鄭中基即時變成「愛妻號」，兩公婆不時弄女為樂，更直言會追多個繼續生，鄭中基為答謝老婆生女有功，早前闊綽地送贈五千萬豪宅，日前更抽空陪老婆海邊拍拖，認真浪漫。
黑超遮素顏
日前傍晚6時一身便服打扮，孭着相機袋的鄭中基，於助手陪同下現身金鐘等的士，兩人上車後直往淺水灣，甫落車便見鄭中基冧爆地邊講電話邊橫過馬路，步入沙灘邊一間有無敵海景的餐廳，繼而點了啤酒坐在露天茶座，邊望景邊品酒。
未幾，素顏戴黑超的余思敏於司機陪同下出現，穿上短裙仔的余思敏手持一支雪茄來到，急急腳步入餐廳會合老公，甫坐下便除掉黑超，無懼素顏示人和老公雞啄唔斷傾偈，及至記者上前拍照，余思敏動作敏捷地戴番黑超遮樣，兩人友善地揮手打招呼，問到為何不帶同囡囡出來望海，鄭中基說：「佢喺屋企瞓緊覺呀！」原來，兩公婆趁囡囡睡覺偷偷出街拍拖飲酒兼食雪茄。
文、攝：追蹤組