馬德鐘難忘戴妃：佢好nice
藝人馬德鐘入行前曾任警察，身形高大的他亦當過G4，更保護過不少國際政要人物，包括有前任港督、中國高官、甚至查理斯王子及已逝世的戴安娜王妃。今年適逢英女王登基60周年，曾被英國統治過的香港人，對英國皇室人員總存在一份情意結，馬德鐘慶幸保護過王子王妃！由今日起一連五天，馬德鐘將與讀者分享他入行前後的種種點滴，讓大家了解水銀燈下的另一個他！
我入行之前做過警察，其實家人都好支持我，嗰時屋企狀況唔算好，想幫補屋企，覺得做警察幾穩定，而且自己當時都好熱血，想為社會做番啲嘢，所以中三畢業後去少年警察訓練學校讀咗兩年，畢業後任軍裝。第一次拍住師兄行咇時好緊張，仲記得自己抄錯牌，嗰陣時心目中覺得做警察就好似拍警匪片咁，巡邏時會遇到啲壞人，但so far我守嘅荃灣區都好和平，冇乜拉過人、冇遇過大案，最多都係處理吓啲家庭糾紛，或者噪音騷擾。
佗槍多年冇開過
而最驚險一次係要追個犯，其實我都係運動健將，但原來當你着住制服、孭住晒啲配件去跑時，係完全兩回事，所以我真係覺得警察嘅制服係錯晒，仲要着住對皮鞋，又要撳住頂帽，啲配件起碼有幾十磅，根本係唔會追到賊，真係好笨！做咗年幾軍裝後，我又轉做藍帽子，主要處理啲反暴動同示威，做咗年幾再轉去做便裝警察，都要孭槍，但咁多年都冇開過，人哋話係好事，手銬就有用過，用嚟押犯，不過後來我都係覺得冇乜挑戰性，就申請做G4，要從頭考過試，當時係20歲。
唔使陪埋入廁所
做G4都好睇身形，我生得高大，行出嚟都叫做有台型。G4最主要工作係保護政要人物，我試過保護戴安娜王妃與查理斯王子、前新加坡總理李光耀、前中國高官同前港督。我真係覺得自己好幸運，竟然可以有幸同皇室人員同升降機，查理斯王子係好有紳士風度，令我感受到好強烈嘅貴族氣場，真係不愧出自皇室。而戴安娜王妃好nice好友善，有次佢去中環shopping，買咗嘢叫我幫佢攞住，但我話我唔可以咁做，佢都好明白，自己攞番。至於前新加坡總理李光耀，印象最深刻係佢keep得好好，證明佢對自己係有一份堅持，同埋對人生有追求。
而好多人都有興趣想知，究竟我哋使唔使跟埋受保護嘅大人物去廁所？其實喺佢哋如廁之前，我哋已經check過晒成個廁所，確保冇人先block咗畀佢哋入去，唔係真係連去廁所都要寸步不離嘅！
Profile
馬德鐘（Joe Ma）
出生：1968年6月27日
身高：1米85
入行經過：1991年因拍攝廣告而入行，1993年加入無綫。
代表作品：《創世紀》、《衝上雲霄》、《鳳凰四重奏》和《富貴門》等劇集。
口述：馬德鐘
筆錄：名人組
服裝：BOSS Black