「喊包」林司敏一哭成名

「女人水造」，這個詞語形容近日在廣告中一哭成名的寰宇新人林司敏（Ciwi）最為適合不過。廣告中因誤會男友提出分手哭成淚人的Ciwi，現實生活中亦是大喊包一名：「我好易喊，尤其細細個。試過有個男仔撞跌咗我最鍾意嘅原子筆，我都可以喊一餐，因為我覺得支筆好痛。當然大個我都有因為分手喊過，但我好快就會變番堅強，因為我覺得橫掂笑同喊都係咁過，點解唔開心啲呢？」

導演心驚膽戰

鏡頭前哭得悽美動人的Ciwi，鏡頭背後卻令導演心驚膽戰：「因為我試戲嗰陣無喊，導演一直好擔心我拍嗰陣喊唔出，叫我返屋企要練吓點喊。點知當我喺架無人嘅的士度培養情緒嘅時候，已經喊到收唔到聲，導演見我咁快進入狀態，即刻拿拿臨跳拍咗我喊嘅戲份先，佢驚我喊晒啲眼淚。」

不停去洗手間

Ciwi笑指自己是水桶一名，最高紀錄一天可喝下4.5公升水，如此彈藥充裕，難怪這麼容易便哭出「一公升眼淚」：「好記得嗰陣喺敦煌拍戲，因為好乾燥，我一日可以飲到三大支1.5公升嘅水o架。」如此飲得，難怪拍廣告時一口氣喝下足足十支水亦面不改容，更難得翌日沒有水腫：「飲完啲水後，我嗰晚去咗好多次洗手間，每半個鐘頭去一次，好彩第日我都無水腫。」

採訪：影視組

髮型：Vanessa Kong@HAiR

場地：家傳滬曉＠apm