江若琳送肉嘴 BB扯髮回禮

寰宇藝人江若琳與馬來西亞歌手阿牛早前在新加坡為新戲《結婚那件事之后》拍攝，由於劇情講述二人由夫妻升呢成父母，故Elanne與阿牛及一名只有十個月大的小演員「偉偉」有不少對手戲。

激發母愛

雖然Elanne現實生活中仍是獨身，但她似乎相當恨有小朋友，只見她開工期間無論鏡頭前後都對偉偉愛不釋手，除了全程緊抱唔放，又不時送上「愛心肉嘴」，可惜偉偉不但未有因此被融化，更不時咬Elanne及扯她頭髮「回禮」。

江若琳狂送香吻，可惜偉偉唔多受。	出名擦得的江若琳，見到滿枱美食便流口水。	江若琳為阿牛踩背。

偉偉狂派檸檬，不過Elanne不但未有生氣，更向偉偉母親打趣謂：「我成日想搶你個仔返香港養，哈哈哈！」遭偉偉激發無限母愛的Elanne，坦言與BB合作後，更明白為人父母的辛苦：「喺片場見到有專人服侍個B，我就明白同BB玩就開心，但湊就好辛苦咯。」

(目及)仔心動

再結片緣的Elanne與阿牛，整個拍攝過程表現得異常有默契，除了於空檔研究拍照心得外，Elanne更為阿牛踩背，Elanne謂：「有個場口話我哋上育嬰班，我見到地下咁多墊，咪順便玩吓踩背咯。」

Elanne又指由於與阿牛太投契，時常遭工作人員取笑很登對，但其實真正令Elanne心動的，卻是一段沒結果的異地戀：「我喺餐廳遇到一個好靚嘅外國男仔，但因為齋望冇行動，所以冇結果。」

文：影視組