林子善手勢好入廚冧女友
主意多多的林子善與拍檔鄧東明（Tony）導演投資過百萬在大坑開設冰室，子善渴望父親可以他為榮！他更自爆自己廚藝了得，皆因過往多任女友均稱讚他「好手勢」！百足咁多爪的林子善不但涉足影視界，早前又踩入夜場開設DJ公司賺到盆滿缽滿，現時他更在大坑開冰室，但他謙稱全靠朋友幫忙才成事：「其實我真係無咩生意頭腦，之前合資開DJ公司都係為咗撐朋友，今次開冰室都係全靠Tony打點一切！佢7月頭同我傾開冰室，8月頭就話我知已經租好舖頭，我哋仲要預備8月尾就開舖，雖然一切都嚟得好快，不過相信以佢過往開狗仔Cafe，同我開大牌檔嘅經驗，應該可以成功！（投資咗幾多錢？）百三萬左右，我同Tony一人一半！」
希望幫助人
孝順的林子善開冰室的另一目的，原來是想爸爸以他為榮，他坦言：「我爸爸以前都有開茶餐廳，但係一直以來都蝕錢，因為佢信佛，經常請窮人食飯唔收錢，點知最後佢幫幫吓人，搞到自己舖頭都執埋笠！我開冰室係想爸爸以我為榮，想證明畀佢睇我係識做生意，而且幫人有好多方法，係應該身體力行！」林子善更笑言被多位女友讚「好手勢」：「我細個時拍過好多次拖，個個女朋友都讚我煮嘢食OK！我好鍾意煮嘢食，而且男人煮飯畀深愛嘅人食係一件好幸福嘅事！」
攝影：黃叔榮
場地：炳記茶檔