徐濠縈慶幸：我冇豬朋狗友

我係雙魚座，個人敏感重感情，又多愁善感。朋友對我嚟講好重要，因為我唔開心，唔會收收埋埋，個女（包包）又細，都唔明噏乜，有時啲嘢又好難同屋企人講，朋友就係最好嘅傾訴對象。我係個慢熱嘅人，好怕人對我太熱情同太過主動，又或者知我係邊個嘅老婆而想同我friend，我會驚囉！老公成日話我個樣cool會嚇走人。其實我好難熱情，諗嘢時冇表情兼唔出聲，先畀人覺得個樣寸同惡，但盡量會改變。我覺得自己好幸運，個個朋友都對我好真心，冇豬朋狗友，我唔會識啲唔真心嘅朋友，好似我同Eason感情出問題，馮德倫嗰排喺我身邊好多，不停咁勸我！

性格直 人緣不俗

我性格爽直，唔鍾意轉彎抹角，人緣亦算OK，有唔同類別嘅朋友：跑步友、媽咪組，唔同類型嘅朋友都吹到水，不過有咗包包，好多時間放晒個女度，又或者時裝店度。朋友之中見得最多，我諗係Johanna（本地時裝設計師何志恩），大家都有小朋友，佢兩個女係我哋契女，而我同佢設計上又有合作。Wyman（黃偉文）都會成日見，佢太鍾意包包，至於霆鋒就好似一陣風，佢好忙，不過一年都見到幾次。

為湊女 減少夜蒲

其實，我依家都鍾意蒲，不過有女要湊太攰之嘛！以前個女仲細，每星期可以蒲一、兩晚，我仲記得有雜誌話我唔湊女排隊去蒲，真係好笑，如果你日光日白影到我仲去買啤酒飲就話啫，我等個女瞓咗去蒲有乜唔恰當？總之，我唔會澄清，最緊要瞓我隔籬嗰個知發生乜事就得，但佢都冇出聲，其實我好有交帶，去邊都會講低。你估Eason唔想蒲咩？佢咁紅，公眾場合佢點去，加上佢好易醉，試過飲一罐啤酒就「冧」咗，點帶佢出嚟蒲？所以Eason只會去梁漢文屋企打機，而我就同Karen（梁漢文老婆林文慧）去蒲。不過包包開始大，會同你傾偈，瞓晏啲都唔得，我冇咁嘅精神去蒲，依家夜蒲要等大日子先有機會！

文：名人組