港姐爆唇瘡病毒陳潔玲曾明俐中招
將於周日晚假將軍澳電視城舉行的《2012香港小姐競選決賽》，準港姐陳潔玲昨出席記者會時下唇爆唇瘡，她懷疑是公司的化妝品不潔，加上唇彩是佳麗共用的，容易造成交叉感染，另一佳麗曾明俐早前也中招生瘡。
十位準港姐昨日與表演嘉賓著名魔術師Cyril Takayama出席記者會，現場所見以瘦身十二磅的朱千雪狀態最勇，有力挑戰三甲；熱門湯洛雯則現疲態跌Watt出現大眼袋；陳潔玲則生了唇瘡，實在有礙觀瞻。
對崔建邦冇feel
陳潔玲受訪時大爆公司化妝品不潔，她說：「可能係啲化妝品唔乾淨，因為唇彩係大家share用，加上呢排唔夠瞓抵抗力差，曾明俐都生唇瘡，所以公司之後都要求我哋用番自己嘅唇膏。」曾明俐則指唇瘡已經痊愈，她透露在外地的男友不會親臨現場打氣，但會不斷透過電話為她打氣。
此外，陳潔玲近期與崔建邦傳緋聞，她則斷言與崔建邦沒有feel，陳潔玲說：「佢對個個女仔都好好，會提點我哋注意懶音，佢係出色嘅司儀，但唔係我嘅對象。」崔建邦則謂：「唔係事實唔回應，簡直係天方夜譚。」崔建邦又讚朱千雪和岑杏賢口才大有進步。
朱千雪絕食瘦身
愈瘦愈靚的朱千雪笑謂決賽前會「絕食」修身，性格坦率的她說：「瘦身後信心當然增加咗，自己都覺得靚咗。」問到瘦身後上圍可有縮水？她說：「尺碼自己就冇度，應該都有少少，但又唔使話換晒啲內衣。」相反湯洛雯則因是熱門人馬而感到壓力，她說：「自己覺得狀態麻麻，呢排平均瞓六個鐘，眼袋好大。」問到湯洛雯可因共用化妝品生唇瘡？她說：「我又冇，可能係唔夠瞓抵抗力差。」
港姐大起底
爆料熱線：3600 1022
爆料傳真：3600 1000
爆料email： entertainment@opg.com.hk
採訪：影視組