Kelly封肚 幾年後再追
已有兩名愛子的陳慧琳（Kelly）一直「恨」追女，昨日她出席活動時表示暫時封肚不生，專心湊仔，但留有後着不排除幾年後再生。Kelly又自爆每逢出埠，老公都會將兩個寶貝仔的片段拍下轉發給她，讓她望梅止渴。
Kelly昨日與模特兒汪圓圓、Cara G.及周國豐夫婦等出席美容活動，Kelly透露大仔「蝦餃仔」將入讀幼稚園，問會否和李嘉欣一樣因太掛念兒子而患上抑鬱？Kelly坦言明白嘉欣的意思，但幸好未試過，她說：「有時我出埠老公會影低佢兩個嘅短片send畀我。（裸照？）冇影，肉照就有。（會唔會一家人去影樓影全家福？）我想，但老公應該唔想，男人怕影相。（着婚紗影？）着唔落件婚紗，要做過！」
至於會否效法嘉欣封肚？Kelly有所保留地說：「呢個時刻封囉，過幾年就唔知！」
蝦餃仔驚打雷
最近天氣不穩定，Kelly透露「蝦餃仔」慘被雷聲嚇怕：「大嗰個一聽到雷聲好驚，佢唔知咩嚟。」提到細仔「小龍包」的近況，她即笑言：「佢好肥，成個包咁，開始似蝦餃仔。（遲啲蝦餃仔返咗學會輕鬆啲？）普通啦，返學好多病。如果病，大佬要隔離以免傳染細佬。」她並說將錄製新歌《點心》，還笑言會教囝囝唱此歌。
圓圓擺明恨嫁
同場的汪圓圓對於早前被拍得試婚紗，她解釋是為了工作。是否恨嫁？圓圓說：「女仔見到婚紗都會有呢個諗法。（逼婚？）唔會，不如喺活動你哋問佢（男友）啦。」至於將為人妻的Cara G.坦言希望30歲前生BB，婚後是否不設防？她說：「我會努力造人。」
文：名人組