Mia白色巨塔抗Lavina黑乳
模媽Mia（陳靜儀）前晚以白色短裙谷胸為電影《喜愛夜蒲2》宣傳，露出驕人事業線，即使未有參與演出的Jeana（何佩瑜）及Lavina（鍾蕙芝）都以黑裙騷胸露腰搏盡上陣，Jeana雖特意前來撐場，卻倒米指：「呢啲戲梗係留番喺屋企睇！」電影公司真多得你唔少！
電影《喜愛夜蒲2》近日馬不停蹄宣傳，前晚一眾演員包括連詩雅、模媽Mia（陳靜儀）、Avis（陳偉成）、沈震軒、松岡李那等再次總動員到酒吧造勢。連詩雅收起性感，即被今集無份但谷胸到場的Jeana及Lavina搶盡「峰」頭，幸有Mia穿上白色低胸裝，谷出「警鐘胸」抗衡。
對於無份演出《喜2》的Jeana同Lavina忽然出席，Mia卻暗寸Lavina：「拍嘅時候無留意到佢，（佢搶風頭？）多啲人一齊搏囉，（今次係咪終極性感？）留番首映先，下次露其他嘢。」Mia除了預告好戲在首映外，更大爆之前曾送潤唇膏給Avis：「拍戲嗰陣一直錫咗幾粒鐘，送畀佢，等佢無咁dry。」
Avis家破人亡 多得導演
為拍此戲而與Mia傳緋聞鬧得熱烘烘的Avis，笑指多得導演令佢家破人亡：「多謝導演指夜場有真愛，搞到我家破人亡。」他透露女友周秀娜忙於工作，要包場才能請她看。
此外，Jeana玩遊戲時繼續搏盡玩口傳試管，蜜運中的她被追問與男友婚期，她指幾年後才會考慮，暫時未有計劃。當問到會否與男友一起入場觀看時，她竟倒米地表示：「呢啲戲梗係留番喺屋企睇啦！」
文：影視組