蒙嘉慧：開心緊要過嫁
盛傳末日前結婚的蒙嘉慧（YoYo）和鄭伊健，昨傳出伊健縮沙搞喊YoYo，昨出她出席手錶活動時，全程笑容滿面，強調絕不會因嫁不出而流淚，看來婚事十拿九穩！
藝人蒙嘉慧（YoYo）及好友黎諾懿昨日出席天梭錶腕錶發布會，宣傳品牌推出全球首枚高科技觸碰感應腕錶，他們更於台上玩遊戲，氣氛熱烈。
打機標眼水
YoYo被問到有指男友鄭伊健縮沙，致屢傳婚訊的她未能如願結婚向方中信狂呻，更邊呻邊流淚。YoYo笑着大方回應：「我懷疑係我啱啱打完機，標眼水，所以抹眼水。」她強調自己並不擔心嫁唔出，即使不結婚亦沒所謂：「我唔會因為嫁唔成而喊。（好肯定嫁得出？）唔係，我唔會諗嫁唔嫁得出，開心重要過嫁得出！」
至於一直盛傳「蒙麵」二人將於年底結婚，YoYo即無奈地說：「我都冇講過，今年都冇乜時間，拍劇拍到10月。（伊健會唔會喺演唱會畀驚喜你？）110%唔會，如果會咁做就唔係佢。」
黎諾懿力撐
同場的黎諾懿對於好友婚事的種種傳聞，他說：「唔使刻意結婚，兩個人開心，好過有證書縛住啦，我眼見佢哋兩個都好開心。」另外，對於有指他拍劇時，驅趕同場的城電老闆王維基劇組一事，黎諾懿即澄清說：「冇，大家將就啫。因為嗰邊隊crew都係無綫以前嘅人，大家好商量，冇拗撬。」
另外，記者致電向方中信求證YoYo偷泣一事，他在電話中跟YoYo口徑一致，他說：「肯定冇喊，佢擤鼻涕之嘛？佢背住我都唔係好知，我見佢有成袋伊健演唱會飛喎！應該冇事，同佢開工咁耐，佢一直好開心。（知唔知佢哋幾時結婚？）冇同我講，一路見佢心情好好，成日買鹹濕嘢畀我食。（YoYo有咗？）冇咁快，佢的確係肥咗，佢知我鍾意食所以買畀我啫！」
文：名人組