邱淑貞影「辣跑」冧老公

現年44歲的豆斗，自下嫁時裝王國I.T老闆沈嘉偉後，已淡出幕前印印腳做少奶奶，並先後誕下三名女兒沈月、沈日及沈星，雖然未能如願追仔，但全家上下對囡囡對寵愛有加。

沈嘉偉交棒抱女

上周五晚上7時許，居於港島區豪宅的豆斗，與老公帶埋快將兩歲的細女，長途跋涉去到沙田行街買玩具，同行還有一名女友人。沈嘉偉抱住穿上白色裙子沈星，直至進入大型玩具店才交由豆斗照顧，由太太抱起愛女揀選玩具。

豆斗一見玩具跑車，即拎起手機拍照。

豆斗將細女交由女友人照顧下，安心畀錢。

眾所周知沈嘉偉是圈中數一數二的車癡，並擁有多部辣跑，當中包括林寶堅尼、法拉利及GTR等，未知豆斗是否想囡囡日後當車手，進入店內第一時間往選購電動跑車，當中亦有老公至愛的林寶堅尼電動跑車，豆斗半踎用電話逐一拍下不同款式的電動車，之後還叫埋老公一齊睇。

沈星怕玩具被搶

睇完電動車，豆斗抱囡囡去揀玩具，沈星對粉紅色的玩具特別喜歡，不時伸手去觸摸玩具，豆斗向店員詢問幾句後，店員即為她取貨到櫃枱，然後豆斗向囡囡輕聲地說：「媽咪去畀錢喇！」之後便將囡囡交給同行女友人，尾隨的沈星全程望住新玩具，似怕被人搶走，相當搞笑。

文：追蹤組

攝：秦健輝