苟芸慧讓愛祝福周麗淇

無綫小生鄭嘉穎貴為視帝，加上外形俊朗兼吸金力強，自然成城中筍盤。自與佘詩曼「分手」後，嘉穎緋聞女友如車輪轉，繼過氣緋聞女友模特兒徐靖雯，先後又被指與苟姑娘拍劇咀出愛火及翻撻舊愛Niki，視帝感情生活比在新劇《怒火街頭2》中更為多姿多采。

「戀情」難控制

昨日嘉穎三位緋聞女友各自出席活動，Niki與苗僑偉等為新劇《好心作怪》試造型，對於被指與苟姑娘爭做「嘉穎嫂」，Niki表示目前要專注工作，拒絕多作回應：「問番當事人，（你咪當事人囉！）都係冇回應，集中工作，啲緋聞我都跟唔切。」Niki否認在橫店工作時與嘉穎夜出短聚，又拒絕評論苟姑娘與嘉穎是否合襯：「可能大家知我單身，未有人出現，都會有呢啲新聞，我都冇辦法控制，唔好理囉！（可能好多人期待你哋復合呢？）咁呀……唔知講乜嘢！」

享齊人之福的嘉穎繼續冇影。（資料圖片）

徐靖雯不想再回應鄭嘉穎的緋聞。

徐靖雯變觀眾

至於宣傳《怒2》的苟姑娘則輕鬆打趣回應：「以前寫我追人，今次終於輪到人哋追我！（傳嘉穎翻撻Niki？）我唔知，如果係真我祝福佢哋。」她笑指有粉絲指她與嘉穎的「三角戀」比新劇劇情更吸引：「如果緋聞有助收視，都冇乜所謂，戲外我哋（與嘉穎）冇聯絡，上次見佢已經係上一次宣傳。」對於被網民狠批鄉音惡頂，苟姑娘指「最大敵人是自己」，並覺得已逐漸有進步。

而徐靖雯出席apm活動時，表示沒有留意嘉穎的緋聞，又大呻謂：「緋聞真係好難甩，兩年喇！都追問緊我，問番佢哋啦，我冇意見。（唔想再理佢啲事？）唔可以咁講，喺呢件事上面，我都係一個觀眾。」至於男主角鄭嘉穎則在截稿前仍未有回覆，令三角關係更添懸念。

文：影視組