JC勤練國語 胸炸大陸

親情、錢途兩難全

依家我比較多時間在香港工作，但自己一路都有出錢買機票返洛杉磯做casting，我冇放棄嗰邊市場，其實一個人唔喺洛杉磯或者唔喺香港個狀況都係一樣，比較難去爭取工作機會。依家洛杉磯嗰邊嘅公司都有問我幾時返去，不過自己唔想好似一件貨物咁擺來擺去，始終我都有朋友。之前我返嚟香港，嗰邊公司都有問我係咪唔會返嚟，或者幾時返嚟，香港嘅經理人都知道呢件事，但如果我要返去發展，可能就要留好耐，但我又唔想放棄香港市場，令我有啲矛盾。

其實留在洛杉磯除咗工作外，照顧屋企人都比較方便，即使屋企人喺芝加哥生活，但如果佢哋有事，或者屋企人嗌交，只要打個電話嚟，我飛過去都好近。如果喺香港嘅話會比較唔方便，我未必可以即時過去處理或者見佢哋。但喺工作方面，香港搵錢係比美國快，正如喺香港我係一位中學生或者係大學生，但係美國的話我只係一個小學生，大家嘅級數係有唔同，所以自己有時都好難去抉擇。加上我唔係一個識得應酬嘅人，我好願意去做呢樣嘢，我知道呢件係一件好事，但講真唔係好叻，大多數在香港都交畀公司，我不會私下去，如果有公司同事陪會感到舒服點。應酬飯局，跟製作人見面，呢個係美國當地文化，但我真係唔習慣。

經歷情傷，JC對揀朋友或者男友都比以前小心。	JC的家人都在美國，返美當然方便照顧家人。	JC睇慣自己的胴體，已不覺得有幾性感。

一路我嘅夢想都係做演員，做咗模特兒都有一段時間，15歲便入行，所以依家想有點轉變，想轉型拍戲，一步一步咁去做，當然拍戲係要拍別人留意我嘅內心戲，可能一開頭要演一啲好性感嘅角色，但只係我一個階段，長遠當然唔會啦！

戀愛可遇不可求

雖然我不懂得廣東話和普通話，但我想發展內地市場。之前去上海做電影宣傳，想跟其他人介紹自己，希望可以同人距離近啲，但我發覺唔識講普通話，根本唔知點介紹。正因為我要去跟導演、製作人去sell自己可以拍戲，我需要講普通話，所以依家學緊普通話！雖然學普通話對我嚟講可能係好難，但我相信只要我肯學，一定學得到。可能有人會叫我識個說普通話嘅男仔，哈哈，我係有見過其他人咁樣而學語言學得快啲，但我真係唔會！

講到感情，我唔會追求靚仔，因為靚仔trouble，如果自己年齡仲細，可能會搵一個令我開心和對我好嘅男仔，但我依家要努力工作，賺錢養家，這樣就會令我開心，所以唔需要有呢個男仔的出現。當然如果我依家搵到個好男仔，我唔會抗拒，我係一個鍾意戀愛的人，但呢樣嘢應該順其自然，有一句說話我覺得好啱，就係：「如果你夾硬追求愛情，你係不會找到的。」

現在嘅感情生活係空白，跟韓國攝影師只是好朋友，而嗰位在派對中的男子都是朋友，當日無做過太親密的行為。講真依家係有人追，但大家只是認識階段，我覺得要有感情的基礎，認識得耐先可以跳入另一種關係，如果對方想跟我拍拖，佢一定要好了解我，要體諒和明白我的工作。

拒與好色者來往

或者早前感情上經歷不愉快嘅事，依家好難相信人，無論對方做乜都好都唔會影響我嘅決定，我覺得可以相信你，我先會去信。以前我係一個好easy go嘅人，但依家會好小心，如果有人有目的咁認識我，而嗰個目的我唔想嘅，我係唔會理佢。我唔會認識只係鍾意我身體某部分嘅人，所以所有男生都係由friendship開始，唔會即刻就跳去拍拖，一定要了解同認識夠深先會考慮。

後記:見慣「豐乳」 盡視作自然

JC因「警鐘胸」成為性感女神，那條深長事業線俘虜萬千宅男，訪問當日她例牌谷行C級「警鐘胸」，但對此她卻認為小兒科，她說︰「大家對身體非常敏感，着Deep V或者Low Cut都受注目，但我唔覺得自己性感，每日沖涼都會望自己嘅身體所以都睇慣。」

口述︰Jessica C.

筆錄︰藍裕彤

場地︰Zummer