祖兒作煮氹師兄
【蔡志豪澳門直擊】容祖兒前晚出席澳門首映，男友兼演員劉浩龍依然未有亮相，師兄將於後日（13日）生日，祖兒如何為男友慶祝？她表示自己廚藝雖然不精，但會學習一下。
樂壇天后容祖兒、內地演員胡歌、香港藝人陳家樂和冼色麗、監製兼演員杜汶澤和導演麥曦茵，前晚在澳門銀河影院出席英皇電影《DIVA華麗之後》首映禮，有份演出的劉浩龍（師兄）未見影，祖兒更為她的「華麗天后雲裳展」揭幕，展示八套心水舞台服飾。
工作行先唔遺憾
師兄沒有出席首映和宣傳，祖兒不覺遺憾，始終工作為先，會否一起再入場睇，她說要看時間而定。會否要師兄睇十次？她說：「你哋話事啦，我唔話事。人哋行人哋嘅路，我行我哋嘅路。」師兄後日（13日）生日，屆時她要在佛山、東莞宣傳，拍拖後男友首個生日不能共度會否感可惜？幾經追問下祖兒才說：「點會！（買咗禮物？）冇呀，得閒食餐飯啦。（燭光晚餐？）好、好、好。（自己煮？）但我唔叻，學吓啦。」
阿澤爆Mani大鑊
阿澤亦體諒師兄因為工作忙未能配合宣傳，雖然可惜但冇辦法。覺得唔畀面？阿澤說：「佢係電視劇第一男主角，我尊重佢要工作，唔通拍嘢唔重要，睇戲重要咩？叫佢買飛睇番自己精湛嘅演出，之前莊文強都話佢係傻強接班人。」
阿澤在戲中演大反派、壞人，他笑說：「Mani（霍汶希）問我係咪影射佢，我話你點止咁差、咁壞呀？我已經好留手，全香港人都知你係壞人啦。跟住Mani恐嚇我，叫我唔好再話佢係壞人，否則爆我衰嘢，佢頂多爆到年尾，但佢啲衰嘢我可以爆十年！」同場的陳家樂指香港首映當晚在戲院看到與林欣彤分手一幕，感動落淚。