蔡志明讚爆加怡笑女婿執到

蔡志明昨日嫁女，二女蔡加怡（Crystal）下嫁設計師男友陳漢驄（Jeremy），新郎先到蔡家位於九肚山的豪宅接新娘，再到中文大學崇基學院禮拜堂行禮，晚上則假灣仔會展筵開八十圍大宴親朋。

昨早八時許，身穿中式唐裝的新郎在五名兄弟團陪同下接新娘，經過一輪玩新郎遊戲後，蔡志明便把穿上裙褂的加怡交給Jeremy，期間不忘幽默地說：「你執到啦光頭仔，有個咁好嘅老婆，又靚又叻女！」其後，一對新人換上西禮服，加怡穿上Oscar de la Renta婚紗，明艷照人；接着二人乘坐勞斯萊斯到達行禮現場，禮成後蔡志明一家與新人大合照，加怡與Jeremy更在記者面前咀嘴，大晒恩愛。不過，Jeremy的父母就十分低調，未有大合照便先行離開。晚上加怡再換另一套Vera Wang婚紗示人。

一對新人禮成後錫錫，sweet爆燈！

蔡家與新人合照，但男家父母非常低調，未見影蹤。

跟親家相識50年

蔡志明夫婦坦承捨不得加怡，蔡太送了大金豬掛着六隻小豬的金牌給女兒，蔡志明更大手筆，他說：「我送咗間三層嘅屋畀佢哋，幅地買咗好耐，加怡話鍾意咪送畀佢囉！喺我哋屋企隔籬，以後可以成日見。（間屋市值幾多錢？）有一萬八千呎，市值近四億。（之前大女加敏結婚你派二百萬利是畀員工，今次呢？）今次冇派，只係食飯同送咗餅。」問到對女婿的評價，他大讚：「雖然佢大大隻隻，但好斯文，對加怡都幾好，最緊要加怡開心。（你話女婿執到？）講笑啫，我同佢哋冇代溝。」他透露與親家五十年前已認識，但雙方有十多年沒見，成為親家是一種緣分。蔡太負責為女兒上頭，她同樣大讚女婿體貼，並畀足滿分。

蔡太教女御夫術

至於加怡笑言很開心成為陳太，問到會否立即造人？她說：「想二人世界先。（媽咪送金豬催你生？）係，但佢冇畀期限我，順其自然。」又笑言媽咪有教她御夫招數，繼又大讚老公好好、好叻。Jeremy亦大講愛的宣言：「我會永遠錫佢，有乜做到都會畀佢。（佢係滿分太太？）係！」說時還眼濕濕。

文：名人組