杜汶澤畀34C辣着 陰濕DaDa
杜汶澤宣傳新戲時將陳靜（DaDa）「貼」在重要部位，DaDa被「非禮」不怒反笑，獲阿澤大讚「好雙乳」，更連隨揶揄舊拍檔薛凱琪「難相處」。談到家中嬌妻田蕊妮，阿澤補鑊讚對方耐用啱自己，三級笑話令全場忍俊不禁。
杜汶澤、DaDa、葉山豪及導演彭浩翔等，昨出席公開活動宣傳新片《低俗喜劇》，期間阿澤竟將DaDa的貼紙貼在褲襠上任影，成為記者相機焦點。DaDa見狀笑謂：「我暈暈哋。」阿澤即回應說：「我慶慶哋。」
讚老婆「好襟」
阿澤見DaDa冇嬲，更打蛇隨棍上謂：「我都話佢『好相與』（雙乳）o架啦，我去年拍咗8部戲，之前係咁對住薛凱琪，估唔到最尾呢套有DaDa，標番個尾會，正所謂DaDa好相與，薛凱琪難相處。」認真抵死。
記者打趣問阿澤覺得家中嬌妻「如何」？他大方說：「佢係中型，『好襟』，我咁嘅年紀身體又唔好，佢對我嚟講就最好。（唔驚佢嬲？）玩吓啫。」DaDa全程旁聽，最後還謙稱：「我有34C，但都想豐滿啲。（仲唔夠？）都想結實啲。」她又指阿澤對自己「恩重如山」，故日後接戲會先考慮對方出品。
放棄內地市場
另外，《低》片連續幾星期搞試映場，保守估計未正式上畫已錄得百萬票房紀錄，難怪阿澤坦言：「我搵到投資方，明年搞電影會放棄內地市場，拍低成本，本地製作，想大家笑吓。」
文：影視組