黃秋生後悔 飲大賣身
【楊晉安佛山直擊】黃秋生昨日遠赴佛山，為由他飾演葉問的新片進行開鏡儀式，秋生笑言因為飲醉了才接拍此片，又謙稱自己沒有武功底子，卻要應付戲中連場打戲，此片應改名為《黃秋生終極一戰》。
黃秋生、袁詠儀、鍾欣桐、陳嘉桓、冼國林及葉問長子葉準，昨日齊集佛山西樵山夢工場影城，出席新片《葉問－終極一戰》開鏡及打手印儀式，內地女演員周楚楚烏身打手印時，心口事業線搶盡鏡頭。
秋生對於即將飾演詠春一代宗師葉問，他笑言：「接呢套戲係被冼國林師傅誠意打動，佢趁我飲醉，問我開呢部戲好唔好？我答佢好，點知第日醒咗先知後悔，我冇武功底子，要打咁多場，好辛苦，呢套戲唔應該叫《葉問－終極一戰》，叫《黃秋生終極一戰》至啱！」
袁詠儀生日享天倫
黃秋生為模仿葉問神髓，練習木人樁已一年時間，更學習佛山口音，希望把角色做好。另他更大讚劇本，及影城嘅60年代布景，特別有親切感。
袁詠儀在片中飾演葉問妻子，她說：「我九月生日，應該都抽到時間同個仔過生日，（帶個仔嚟影城見識？）佢要游水、畫畫，好忙，不過我個仔唔知點解，已經有個fans club。今日見到阿嬌（鍾欣桐）覺得佢樣好叻好醒，實則份人傻更更，好搞笑，可以拍喜劇。」
阿嬌則說：「呢套戲要拍兩個月，期間會往返香港同內地，因為接咗廣告要拍，我冇時間遊佛山，仲要跟冼師傅學打詠春。（驚拳腳冇眼，受傷？）唔驚，會練習多啲，有場戲我要同盧惠光打，佢識就住我，所以我唔驚。」