熊黛林拖狗晒腿引人(目及)
獲愛郎郭富城「認頭」的熊黛林（Lynn），日前心情大靚騷長腿帶兩隻愛犬到大坑睇醫生，離開時，Lynn的雪白長腿極為搶眼，沿途往取車時引來不少男途人回頭喪(目及)，她匆匆帶狗上車閃人。
「富黛戀」相戀六年多，城城早前公開表示始終會成家立室，向Lynn派定心丸，又出面否認網上傳Lynn懷有「城B」被他要墮胎一事，揚言如果有B一定會負責任，似已準備隨時當父親。
獲城城開口「認頭」的Lynn，日前下午6時許帶同家中兩頭愛犬到大坑一家寵物診所睇醫生，心情大靚的她，大騷一雙修長美腿，Lynn在診所逗留約半小時。其後Lynn拖住愛犬離開到附近停車場取車。
揀男仔睇緣分
因Lynn的雪白長腿極為搶眼，沿途有名拖住女伴的四眼阿叔，也忍不住回頭喪(目及)，後來另一四眼男見到長腿Lynn，也停低由頭望到落腳，她急急上車閃人，四眼男望到Lynn驅車走後才捨得離開！
另外，Lynn擔正並與林峯合作的電影《男人如衣服》已煞科，對於近期林峯、吳卓羲及黃宗澤「瘋情三俠」與內地女星傳出桃色負面新聞，同是由內地來港發展的Lynn是否覺得內地女孩子較進取？她說：「呢啲好難講，各有各好，揀男仔係睇緣分，冇話一定大陸女仔定係香港女仔好！」
文、攝：追蹤組