任達華撐倫奧 停工1個月
四年一度的奧運又到，一眾名人明星都遠赴倫敦欣賞揭幕禮。身為運動狂熱分子的任達華夫婦，更首度帶同愛女任晴佳見證盛事，兩人更會在倫敦逗留約1個月，寧願放棄搵錢機會，欣賞完所有賽事才返港。
任達華與琦琦繼四年前到北京睇奧運後，今次再赴倫敦見證盛事，愛女任晴佳亦有同行，但可惜錯過現場欣賞奧運開幕禮。琦琦說：「因為要接個女機，所以趕唔切去睇開幕禮。其實起初任達華擔心倫敦奧運亂，唔想帶個女嚟，但個女再三要求下，老公先帶佢嚟。」
指交通不混亂
有指倫敦的士司機不滿加設奧運專用道路，而地鐵清潔工無補水兼工作量大增，引發罷駛與罷工以示不滿。問到倫敦是否如報道中混亂？琦琦坦言沒有混亂，還大讚當地人友善：「去到邊啲人都會幫忙，好似個女係我媽咪帶嚟，人哋喺機場見到佢兩婆孫都主動幫佢哋。同埋我呢幾日行街影相，老公喺街度見到架保時捷噴晒英國國旗，倫敦周圍好有奧運氣氛，之後會睇足球、游水、羽毛球同埋藝術體操，下個月中先返港。」
琦琦希望中國奪金牌數目勝去年，今次最開心莫過於與囡囡同行：「今次最開心係囡囡，佢曾經嚟過倫敦，但一家三口嚟倫敦都係第一次。」
剛晶恩愛搭膊
另外，著名鋼琴家郎朗在英國倫敦欣賞奧運開幕典禮，昨晚他上載了與「跳水公主」郭晶晶和未婚夫霍啟剛的合照，相中的晶晶掛住大會證件，啟剛則搭晶晶香肩。據知「剛晶」在場內甚受歡迎，頻被邀合照，友善的兩人來者不拒。而莫文蔚亦專誠到倫敦睇比賽，並在微博上載照片。
文：名人組