周迅累莊文強 交重皮電話費

梁朝偉、周迅於電影《聽風者》中合作，兩位好戲之人碰頭，當然會擦出不少火花，該片導演麥兆輝與莊文強早前接受訪問更爆出兩人合作時的「秘密」！

影帝級冇架子

外表精明的周迅，原來私底下有時會出現小糊塗，莊文強表示：「周迅成日分唔清我同麥兆輝，有次佢諗住打畀麥兆輝，點知打咗畀我，佢同我傾到電話無電，個個月打咗三千幾蚊電話費，（問咩問得咁詳細？）佢多數係會問有關角色感情演繹嘅問題。」

麥兆輝與莊文強經常孖住上開戲。	梁朝偉及周迅兩位好戲之人在《聽》中大鬥演技。	梁朝偉在戲中演盲人，為此他更要犧牲一雙電眼。

梁朝偉雖然很早貴為影帝級人馬，但拍攝期間一點架子也沒有，就連「光替」打光替身都「撈埋」，令兩位導演大讚專業：「有啲好紅嘅演員分分鐘夠膽叫我哋請多個人嚟做文戲替身，但梁朝偉就連『光替』都做埋，一來佢明白自己去做番光替效果最好最啱，二來，佢可以同啲工作人員打下牙骹。」

演盲人險傷眼

偉仔的專業不止於此，戲中偉仔飾演盲人角色，麥兆輝揚言他為了這個角色曾犧牲過電眼：「因為我哋打算要佢戴一副灰白色嘅隱影眼鏡，造成白內障嘅效果，但原來偉仔係無戴過隱影眼鏡，因為副鏡片會比正常硬身，佢戴咗之後係咁流眼淚水，我覺得無理由為咗一部電影，傷咗演員對眼，所以最後決定用電腦特技。」

文：影視組