陳嘉桓揀戰衣沖繩晒料

藝人陳嘉桓（Rose）早前獲有線邀請到日本沖繩拍攝旅遊特輯，由於是次Rose首度踏足當地，為了以最佳姿態迎接沖繩的陽光及美景，Rose專誠抽空挑選戰衣」，實行到當地「大解放」。Rose試戰衣期間，獲現場所有工作人員大讚身形窈窕，她聞言即傻笑指是遺傳：「我哋個家族喺三十歲之前都食極唔會肥嘅。」

自細好偏食

已去過數次日本的Rose，笑言雖然很多港人愛到當地購物，但她卻沒有這個福分：「唔知點解，啲衫嘅尺寸唔係好啱我，唔係吊袖就係啲褲唔夠長，好彩都有好嘢食。」Rose又透露由於自小已很偏食，就算魚生也是去年才發現這麼美味：「我一路都唔敢食，直到舊年去日本拍飲食節目，先知原來咁鮮甜！我真係好揀飲擇食o架，好衰，大家千祈唔好學我，我基本上淨係食雞翼，唔多食肉，白切雞見到有少少血都唔食，燒味又唔食，鋸扒又唔食。依家好咗好多喇，只差內臟仲未接受到，生蠔就上次去完康城之後都接受咗喇。」

易曬黑的Rose會帶大量防曬用品，迎接沖繩的陽光。

Rose揀定戰衣，準備到沖繩「大解放」。

帶防曬用品

愈曬愈黑的Rose，更笑指會帶備大量防曬用品到沖繩：「我好易黑o架，唔知如果返嚟會唔會變咗黑玫瑰呢？（你啲膚色好健康喎！）呢隻色係去完泰國同法國溝出嚟o架，法國啲陽光好柔和，曬出嚟啲膚色好靚。」

文：影視組

場地及服裝：Billabong