郭翠華重整旗鼓不做缺塊砌圖

多少年過去了，Ranee K的一張少女面龐，帶幾分童稚的聲音，興奮時手舞足蹈的樣子，偶然傻笑的表情，依然不變，就算今天她已成為別人的妻子及母親。

把時裝生意暫停一年，並非生意不佳，而是Ranee想專注做好母親角色，她解釋：「做媽咪，我係新手一名，所以係要花好多時間，初時覺得自己好似打緊兩份全職嘅工作咁，真係好辛苦。如果要二揀一，我惟有放棄間舖，專心湊好小朋友先。我覺得呢個係一個好時機，畀我休息吓，自己出嚟做嘢咁多年，一直都冇停過。」

放長假學曉放下

經歷了一年全職媽媽的生涯後，Ranee發現生命中多了一個人，但同時又失去了一些東西，沒有了事業的人生就像缺了一塊的砌圖，可能只是小小的一塊，但就是不完整。終於去年Ranee決定重整旗鼓，再次經營自家的時裝店，並首次推出童裝。

Ranee雖然因為兒子而把事業擱置，但她從未覺得是犧牲，套用她的說話這是一個上天安排給她的悠長假期，在這期間Ranee學懂放慢腳步，適當時要放手，不再像以前只顧向前衝，她笑言：「我依家會提自己慢慢嚟，有啲嘢快都冇用，以前唔會識咁諗。依家會識得分配時間，做事更有條理同計劃，否則冇可能兼顧家庭同事業，工作比以前有效率。」

Ranee的囝囝豆豆現時兩歲多，Ranee自認是嚴母，她認為應盡早教育小朋友的紀律性：「我寧願一開始嚴，之後先放鬆。我屋企有養貓，我會畀個責任佢，叫佢負責餵貓，玩具要自己收拾。」Ranee笑言未知是否遺傳自她，豆豆對色彩很敏感，衫、褲、鞋、襪，甚至內褲，豆豆都要親自挑選，很有主見：「我有帶佢去時裝店，有啲客會問豆豆意見，佢唔會即刻答，佢真係會好認真咁睇完先答你。」

囝囝成靈感繆斯

此外，兒子亦成為Ranee的靈感繆斯，啟發她開始童裝設計，她坦言：「絕對係因為有咗小朋友先會諗住出童裝，以前真係從來冇諗過。我見到小朋友喺冬天着到好臃腫，好戥佢哋辛苦，身為媽咪先會感同身受，以前唔會咁留意，於是令我有自己設計童裝嘅想法，我想設計出保暖又潮嘅童裝。」

Ranee笑言做成人時裝只要當事人喜歡就可以，但做童裝就要小朋友及大人都喜歡才能成事，故難度是雙倍，Ranee還有為小朋友度身訂造童裝以及親子裝。Ranee受到兒子的感染，她也會將童裝的圖案運用在成人時裝上，她舉例說：「以前我係唔會用動物做圖案，但依家會覺得幾得意，所以都會試吓用。有時我都會問囝囝意見，問佢覺得邊隻色靚啲。」

採訪：陳嘉敏