李彩華豪掟1,800萬治情傷
上月剛與男友分手的李彩華（Rain），最近以1,600萬購入渣甸山豪宅名門，前日她到新居睇完裝修，即四出挑選貴價家具，當中包括數萬元的巨型浴缸，經歷多次情傷的她，最後更走入珠寶店一擲200萬買了一粒四卡重鑽石，豪使程度令人咋舌。
李彩華近年堪稱內地掘金女王，拍劇每集酬勞已高叫25萬，短短數年間已賺到盆滿缽滿；相反Rain的情路卻波折重重，早前有指她拒借千萬血汗錢給男友潘啟翀，結果分手收場。
試坐廁瞓浴缸
不過，近月發現她以1,600萬購入大坑徑渣甸山豪宅名門一個1,200呎單位，並與已嫁有錢老公的關心妍做鄰居，其實Rain在去年尾已被本報踢爆花1,200萬購入銅鑼灣連平台的特式戶，加上年前在灣仔買入的單位，手持三個物業的她，掘金速度認真驚人。
連日來在Rain剛購入的新居門外守候，前日終於等到她由內地返港睇裝修，不久其母亦偕同一名女友人乘保母車到達上址會合，期間Rain頻頻廳房走出走入度位，並走出露台欣賞景觀。約逗留個多小時後，一行人離開上址轉往灣仔挑選浴室用具，喜歡浸浴的她對浴缸要求非常嚴格，竟然不理店舖近街人來人往，突然跳入價值數萬元的巨型浴缸內，又親自坐到馬桶上試坐，相當搞笑。
寄情工作唔拍拖
Rain使錢使得性起，又拉着母親往中環一間珠寶店，店員知道有貴賓到來即識做安排她們坐下，火速從夾萬中取出一些粒粒過百萬的靚鑽讓她過目，Rain第一時間對鏡左照右照，似乎欲將巨鑽鑲成鏈墜。
鑑賞一輪鑽石後，Rain竟然毫不猶豫一擲200萬買入一粒四卡重鑽石，有說女人失戀狂fing錢，Rain使錢程度果然令人咋舌！記者上前問她買樓又買石時，她笑笑說：「OK啦，啱啱同朱孝天拍完劇，趁有幾日時間返嚟睇下層樓。（使錢唔眨眼喎！）我理財唔叻，全靠阿媽睇實，唔畀我亂使錢，不過，佢都認為買樓同買鑽石係幾好投資。」再問她會否急於開展一段新感情時，Rain滿有感觸地說：「唔啦，對上幾個都唔係咁啱，都係集中精神喺工作上啦！」
文、攝：追蹤組