國王新衣
童話故事《國王的新衣》中，國王自以為穿上聰明人才看得見的布料，結果透出光溜溜的肉體，失禮人前。暫且先不要理會故事背後的寓言，「國王新衣」經時裝設計師「改良」後成為半透視裝，把女性的性感美態若隱若現，更添神秘魅力，尤其在Cocktail Dress和晚裝上大受歡迎。
既然「國王新衣」透出令人遐想的身材，就一定要夠Fit無贅肉，而選擇顏色也很重要，白色容易顯得肥，黑色則可以修飾體形線條。半透視裝並非人人Carry到，一係天堂一係地獄，非高貴性感便是低俗無品，一定要小心穿着，名模陳嘉容就大讚薛凱琪和馬詩慧的透視裝令人眼前一亮。
馬詩慧
「好少見佢着得咁大膽，好有驚喜，有型得嚟又性感，呢套衫佢絕對Carry到。名模真係名模，身形比例好好，咁多年都仲Keep到。」
Angelababy
「好老積，條裙本身好靚，但畀佢着就成熟咗啲，唔啱佢個年紀，有啲似細路女扮女人，個髮型都唔襯佢。」
薛凱琪
「超靚，令人眼前一亮，佢好少着得咁仙女，好飄逸又好性感，開始滲出女人味，畀人感覺大個女。」
徐濠縈
「幾有型，比佢平時嘅打扮Girly啲，幾靚幾有新鮮感。不過透得太少唔會畀人一種性感感覺。」
樂基兒
「ＯＫ，合格，但就冇驚喜，唔夠透視，如果條裙背面無晒啲Pattern會靚好多，佢個身形線條好靚，依家畀啲Pattern遮住，嘥晒。」
Jessica C.
「好夏天，ＯＫ，襯番佢嘅青春性感形象，幾Cute，幾有活力，性感得嚟幾活潑。」
范冰冰
「套衫好靚，不過條裙太長，顯得佢個人矮咗，條裙要啱啱及膝先靚。佢個化妝、髮型同啲Accessories各樣都襯得好靚，但個Bra就好似黐咗兩個殼咁，有啲失色，如果換件肉色嘅Tube Top會更加靚更性感。」
陳嘉容Profile
香港著名模特兒，曾為各大國際品牌行時裝騷，在時裝界打滾多年，無論在時裝的理論還是實戰都難不到她，近年更為電視時裝節目擔任主持，化身Stylist教人配襯衣着打扮。