周柏豪愛‧Share

作曲獲得滿足

今年我多咗個作曲人身份，依家開始會寫歌畀其他歌手，以前係冇乜信心，今年真係好多歌手邀請我寫歌，當中仲有自己偶像。壓力當然有，所以近排都匿埋喺屋企寫歌，最想寫歌畀Eason（陳奕迅）同Joey（容祖兒），寫歌我鍾意慢慢嚟，靈感來自睇戲同聽嗰位歌手嘅歌，覺得佢缺乏啲乜就寫啲咩畀佢。寫歌唔算話賺好多，但真係自己鍾意，有時做嘢唔一定睇錢，好多時工作為咗滿足感，寫歌畀到滿足感我多過唱歌，嚟緊自己會一手包辦成隻碟，算係自己夢想，過去啲碟有一半歌都係自己寫。

上紅館係自己其中一個目標，其實公司都有傾過同計劃，只係自己想所有嘢都做好啲，唔想嘥咗個機會，其實機會同場地都喺度，只欠入紙之嘛，自己要有信心，希望可以3年內踏上紅館舞台，都想老人家（指婆婆）見證到咁重要一刻，其實喺香港開完演唱會後，都有唔同國家嘅機構邀請去當地開騷，等公司安排啦。

有車有樓的柏豪，已定下行善目標，希望利用自己的力量幫助他人。

柏豪近日與連詩雅傳出緋聞。

行善盡力幫人

收入可以講係夠用，永遠唔好以為比以前好，應該同將來去比，咁就會覺得依家好「渣」。依家雖然有樓有車，但叫做過得去，其實爸爸、媽咪都冇做嘢，依家要盡個仔嘅責任養番佢哋，都幾吃力o架。因為要搵錢所以唔係好夠休息，冇乜時間陪佢哋，好開心公司努力幫我搵工作，冇人會同錢鬥氣，依家係播種時間，都開始有少少收成，可以照顧屋企已經好開心。

余文樂（左）是柏豪眼中的哥哥，一同合作打籃球。	柏豪透過與隊友打波，感受友情。	Joey及Eason有機會演繹柏豪的作品。

希望嚟緊搵到多啲錢去幫人，自己好想同朋友夾份喺內地起學校，余慕蓮係我偶像，佢將自己儲蓄全部奉獻去起學校幫助小朋友，係偶像同英雄，希望自己有呢個能力，照顧屋企人、自己之餘，可以將閒錢攞晒去幫人，希望用自己影響力影響多啲人。有諗過成立個人基金，我知係一件幾複雜嘅事，自己唔係好識，如果有人幫我搞就可以咁做。

打波感受友情

依家有時間就打籃球，但永遠工作行先，唔會畀打波阻礙到工作。打波好開心o架，一班麻甩佬，打完波打吓邊爐、傾吓偈。「橫洲工業」球員都有做嘢，有時間咪練習囉，大家都係當玩，唔會有咩拗撬同計較。阿樂（余文樂）真係一個哥哥咁，其實我喺「橫洲工業」係最細嗰個，佢哋個個大我四、五年，個個都好似係哥哥，喺佢哋身上學到好多嘢，「橫洲工業」畀到友情我。

我從來都冇當自己係職業球員，我水平一定唔得，如果計我係《橫洲工業》，當然係球員啦。但大家嘅焦點都落喺我嘅緋聞身上，自己都唔開心，人哋要嚟做善事、想嚟睇同支持，我係冇得拒絕，但出嚟變咗蓋過個球賽，我自己都唔好意思，所以我自己每次打波都會叫同事唔好嚟，唔想將打波變咗做嘢。

我希望每次打波真係打波、嚟嬉戲，冇因為報道而同阿樂解釋，加上阿樂冇話啲咩，大家玩啫，亦都相信佢會明白同體諒。