太極鬧爆政府唔撐藝術
樂隊太極早前舉行的演唱會反應熱烈，隨即添食加開八月一場，五子坦言有意在戶外開騷，可惜支出太大加上場地有限，令眾人無奈打消念頭，成員盛旦華直指香港政府沒有支持藝術，反而落力推高樓市。
太極成員鄧建明（Joey）、雷有輝、劉賢德、盛旦華及朱翰博日前為下月舉行的演唱會宣傳接受本報訪問，問到有否考慮在戶外搞騷？盛旦華說：「我知有人申請緊，而我喺27年前都想搞，依家好難申請。」他解釋說：「開支好大，根本就維唔到皮，單係鐵欄、流動廁所已經成50幾萬，點畀？政府係收咁貴，有太多規定。」
想搞長洲音樂節
問到會否效法台灣在沙灘舉行Band騷？鄧建明說：「我哋都想，但擔心畀人投訴。」問到是否覺得政府在此方面沒有落力？盛旦華說：「冇Support過藝術，只係Support啲樓高啲。」鄧建明坦言有想過到長洲開騷，他說：「有次夜麻麻自己一個坐喺長洲一角落彈結他，之後圍咗好多人，有人提議不如搞個長洲音樂節。」
經常為其他歌手演唱會走埠的鄧建明及雷有輝坦言與隊友極有默契，雷有輝說：「我哋做完騷好少去慶功，反而同Joey落酒店酒廊度Rundown。」劉賢德笑說：「次次都喺佢哋度，我哋信晒佢，因為佢哋成日做演唱會樂手同和音，經驗一定豐富。」
文：音樂組