羽翹啪避孕藥谷咪
在今年書展推出美容書的歌手羽翹，對於時下o靚模為谷寫真無所不用其極極為佩服，她還透露當年拍寫真前，要事先簽訂合約指明不會整套三點式上陣！雖然保守，但羽翹坦言為求寫真效果好，曾試過服食避孕藥谷胸。
歌手羽翹於今年推出教化妝書，她坦言由於自小遇到生暗瘡、肥胖及皮膚黝黑等煩惱，故明白未夠天生麗質的女生如何力爭「完美」，她說：「好難個個都好似張栢芝同Angelababy咁靚，我主要想教一般女仔點樣幫外表隱惡揚善。」羽翹揚言為了讀者福利，新書是零廣告：「無人買就蝕梗！但我都有信心，一來第一本銷情唔錯，二來今次內地都有得賣，遲啲會去廣州同佛山宣傳！」
羽翹不諱言多得當年遭男友嫌棄才努力鑽研化妝：「嗰時成日諗住要青色眼、紅色嘴，完全無諗過啱唔啱自己，後尾先知原來男友覺得女友化妝核突會好無面……入行後我都衰過，試過化紅色嘴，啲色黐晒落牙度，仲要甩色甩剩個框！」
佩服o靚模賣肉
面對時下o靚模為谷寫真無所不用其極，羽翹直言佩服：「我都出過寫真，當年仲同攝影師有合約，話明唔會一套比堅尼咁着，我覺得成套泳衣着同underwear冇分別，全裸更接受唔到。」羽翹直指許穎天台露股照意識大膽，並謂若自己「照辦煮碗」一定趕客，她坦言當年為拍寫真，曾試過吃避孕藥谷胸：「當然唔鼓勵大家咁做，其實飲奶同豆漿都有用。其實我唔鍾意大胸，因我本身好橫，再大會好大隻。」
文：影視組 場地：Bayview@銅鑼灣
髮型：Jay Yeung@Hair Corner
化妝：Lisa C.@www.lisalsc.org
服裝：Jessica Red