葉蒨文苦練攞命拉丁舞

50歲的沙麗愈唱愈強，久違舞台的她前年攞「金針獎」時，依然唱得跳得表現頂呱呱，難怪闊別紅館7年的她，技癢難忍將於9月再開騷，她說：「我好掛住唱歌，好掛住個舞台同觀眾，我個人好奇怪，食嘢永遠嗰幾樣，唔鍾意寧願餓暈唔食，唱歌反而要停一停，想見識吓其他生活。」

為突破唔怕冒險

今次開個唱，好希望跟觀眾過一個開心的晚上，她說：「今次主題係完全是你，7年前演唱會，唱到最後一首歌忍唔住喊，完騷後覺得好失落，好似冇咗男朋友咁，要過一排先唔心痛，但經過咁多年之後，就會好掛住觀眾，好想請觀眾返屋企（舞台）傾偈，過一個開心嘅晚上。」

相隔7年，葉蒨文再踏紅館台板開騷。（資料圖片）

葉蒨文學跳拉丁舞兩個月，她說難過學京劇。

沙麗是個很有主見的人，凡事愛親力親為，故演唱會亦樣樣都要理：「我要睇晒成件事，衰就自己孭，好就未必係我一個，可能要靠好多人幫手。」問演唱會有甚麼突破？她拿自己的年紀開玩笑：「突破就係要冒一個險，咁嘅年紀捱到兩個半鐘已經好突破，依家做完一日運動，返到屋企膝頭都伸唔直，同年紀好有關係，哈哈。」

被指跳到似划船

要求高的沙麗，對自己從不馬虎：「今次演唱會我會跳拉丁舞，學咗兩個月，真係好攞命，仲難過學京劇。」沙麗還自爆瘀事：「5年前同朱玲玲一齊學過，但畀人話我跳到好似划船咁，講到我好灰心，不過依家我會畀心機，承諾一定要跳得好。」

採訪：音樂組

攝影：司徒國榮

場地：The Mira