韓國組合FT Island的亞洲巡迴騷昨晚在香港舉行尾站演出，為應付開騷而靠維他命丸填飽肚子。工作排到密密麻麻的五子，接受香港傳媒訪問時不禁顯露疲態，李弘基更索性攤在梳化休息。
昨晚在香港開騷的韓國樂隊FT Island，五位成員前日率先來港準備，掛着頸枕踢拖行出機場，表現疲態，接受本報訪問期間，崔鍾勛不時打呵欠，李弘基在尾聲更索性躺在梳化上休息。晚上仍要綵排的他們，提到有否為演唱會練定廣東話時，他們即騷Quali說：「我好鍾意你、你好靚女、你食咗飯未？」雖是對住貓紙講，但已見十分重視香港歌迷。
FT Island每次訪港都來去匆匆，問他們如果變裝出門會在香港做甚麼時，崔鍾勛希望能在山頂寫意的邊飲紅酒邊散步，李弘基則最想逛街買盡衫褲鞋襪，他又指：「之前來港同崔珉煥拍完節目返韓國，曾對隊友講大話，話見到中華白海豚，其實係當時落大雨，咩都睇唔到。」
成員最近為演唱會首度挑戰舞藝，李在真坦言被難倒，以後應該不會再跳，而有機會的話，亦想與同一事務所的組合CNBLUE，在音樂上合作。五子工作排得密密麻麻，為填飽肚子，崔鍾勛就負責帶備維他命丸分給隊友維持體力。
此外，早前李弘基為雜誌拍下騷麒麟臂的寫真，不過他說暫時無意轉型露肉：「當日去到拍攝現場，先知要咁着，真係嚇咗一跳，連早餐都唔敢食。」
文：外娛組