陳潔儀慘過痛過 悟出品味

來自新加坡的歌手陳潔儀（Kit），仍是學生時曾於英女王伊莉莎伯二世及愛德華王子御前獻唱，之後獲唱片公司簽約旗下，正式成為歌手，以靚聲聞名。擁有一把獨特嗓音的Kit雖走實力派路線，但其具有氣質的外表以及型格打扮亦深得大家喜愛。Kit本身也很喜歡fashion，日前記者於瑞士腕錶品牌積家錶假上海舉行活動中與kit細談潮流時尚，談起fashion原來跟談音樂一樣可以滔滔不絕。

記：鍾唔鍾意fashion？

K：鍾意o架，以前我會興咩就買咩。由細到大我都鍾意時裝，始終女仔都鍾意扮靚，我會留意每季個trend興啲咩，就算唔會盲目跟隨潮流，都要知道個潮流係點，唔好脫晒節，要keep住update自己。我覺得要經歷過慘痛嘅教訓，喺衣着品味方面先會正。

Kit出席積家錶於上海舉行的活動，以典雅晚裝配上一頭短髮，自有一番韻味。

Kit外表斯斯文文，想不到也有如此性感狂野的造型。

記：咁你有冇遇過咩慘痛嘅經歷？

K：90年代興啲白色好透嘅衫，其實依家都興番，我嗰時都有買，有次我同朋友一齊執衣櫃，摷摷吓搵番呢件衫出嚟，我朋友忍唔住拎起話：「咁核凸都買嘅？」我當時望住件衫都覺得好核凸，唔明自己當時點解會買，仲要好貴，真係好唔值，好嘥錢。依家絕對唔會好似以前咁亂買衫，買嘢會小心好多。如果想玩款嘅，買啲平平地就OK，興一季着完唔再着都唔會肉痛，如果係想買高品質嘅衫，我就會揀啲classic款，買啲襟興嘅款式。

着得舒服自然靚

記：有冇試過着錯衫？

K：喺日常生活就未試過，演出時反而試過。嗰次係演一個時裝舞台劇，我唔記得咗着條瞓覺褲後出面要再加條裙，就咁着住條瞓覺褲就出咗場，演咗好耐先發覺，嗰刻感覺簡直想死。但之後問番其他人，都話唔知原來我着錯衫。

記：你覺得自己係咪一個姿整嘅人？

K：唔係，我唔會左襯右襯，搞好耐先出到門口嘅人。

記：對你嚟講，何謂fashion？

K：依家愈嚟愈講究舒服，真係要着就一定要舒服，如果唔係會覺得好唔自在，好似周身唔聚財咁，自然都唔會着得靚，所以舒服好緊要，要着得舒服自在，先可以表現出自信同靚嘅一面。

記：咩係有品味？

K：比較classic嘅嘢，令人感覺有自信同舒服，即使十年後睇番都唔會覺得好核凸。

記：你鍾意咩style嘅打扮？

K：我鍾意褲裝，會好有自信。當然要出騷或者去event都要着番條隆重啲嘅靚裙，要配合個場合。但平日嘅自己就鍾意着褲裝。

要識得隱惡揚善

記：你覺得咩係時尚？

K：一樣係要着得舒服同自在，時裝潮流不斷變，係咁追冇意思，亦都唔一定適合自己，唔係自己嘅性格，要知道自己身材嘅優點同缺點，點着先可以隱惡揚善，着衫要啱自己。我唔贊成人減肥，搞到自己好唔健康，唔健康又點會靚，唔好覺得依家興瘦就亂咁減肥。

記：鍾唔鍾意奢侈品？

K：要識得欣賞，平實同奢華嘅嘢都要識得欣賞。好似我私底下比較男仔頭，好少會戴珠寶首飾，但係都會覺得靚，會用欣賞嘅角度去睇。

有興趣做styling

記：你之前做OL時特登買過晒啲衫，嗰時嘅衣着打扮咪同依家好唔同？

K：其實之前做OL時買嗰啲恤衫，依家都可以着得番，初初返嗰份工嘅時候衣着打扮會好保守，想盡量低調啲，想人哋留意我嘅工作表現，而唔係我嘅衣着打扮。之後做出咗成績，就慢慢會鍾意玩吓image，可能會係着得型格啲，fashionable啲咁返工。

記：你會否追求生活品味？

K：生活品味對我嚟講好重要，不過要做到唔好理人點講，如果唔係就會冇品質。

記：想唔想做啲有關時裝嘅工作？

K：都有興趣o架，時裝設計都可以試吓，又或者係做styling都幾有興趣。