胡杏兒爆黃智雯遊戲情關

女人的終身事業,莫過於找到一張長期飯票!與男友黃宗澤感情穩定、獨欠一紙婚書的胡杏兒,亦望好姊妹黃智雯(Mandy)能找到幸福,故不介意擔起媒人婆角色,杏兒踢爆Mandy甚受異性歡迎,指她只愛遊戲人間,感情事僅屬次要,Mandy聞言辯稱自己用情專一,兼喜歡「熟男」!

面對前輩緊張

胡:2009年拍《巴不得爸爸》你做我細妹,印象係好乖、好靚同清純,好多新人講唔到對白,唔識做表情、緊張、唔畀心機,你就冇呢啲問題,做到角色要求,傻傻哋得嚟又有喜劇細胞。

黃:我不知幾緊張,第一套算多戲嘅劇。

胡:你第一套劇係咩?

黃:《東山飄與西關情》,《巴》劇係第三部。

胡:不過識你之後覺得你好noisy!

黃:初時識你唔敢出聲,你係大前輩,你坐喺張櫈度令我好緊張囉。

胡:我不知幾nice。

薯片攻略

黃:咁又係,成日買chips畀我哋食。

胡:因為我要整肥你哋,講真我覺得好多新人冇天分,唔識點做。我初初入行都好緊張,又成日垂低頭,試過畀導演鬧添。但你冇呢啲問題,後來先知原來你演藝出身,應該係有幫助。

黃:咁對手都好緊要,《巴》劇算係我第一部可以輕鬆去享受角色嘅劇。

埋堆組三八會

胡:你記唔記得第一次見到我係點?

黃:覺得呢個女仔好濃妝囉!以前細細個睇你啲劇,最鍾意《衝上雲霄》,啲人成日話你cool,其實都唔係,反而令我呢啲後輩感染到你份熱情,好舒服,好有姊妹feel。

胡:因為你傻嘅囉!大家都好快混熟、好夾,我喺圈內唔係好多知心友,除咗你係仲有胡定欣、陳敏之,大家間唔中有聯絡。

黃:你攞視后之後不斷去內地掘金,好難聯絡,惟有用微信聯繫咋。

乘機偷師

胡:後尾我同你、胡蓓蔚、姚子羚、胡定欣設咗三八會,本來諗住每個月食一次飯,但我比較busy,你呢啲後起之秀又追得咁急,所以咁耐以嚟都係食得一次。

黃:哈哈!雖然你成日唔喺香港,我都不時問你意見。

胡:我都開心你信任我,記得你拍《On Call 36小時》有啲問題搵我傾,都幾warm,我都有睇《缺宅男女》,見你可以冇包袱咁演,同埋講對白好快囉!

黃:你講對白都好快又清楚,所以向你學習,我做新人時,有問題會問你,你又解答到,無聊到着衫問題都會問你意見。後尾拍戲壓力大試過唔開心,第一個諗起你,約你出嚟問意見。

胡:你上年係熱門「飛躍」獎候選之一,其實我支持你嘅,攞獎指日可待。

恨識熟男筍盤

黃:拍《怒火街頭》嗰時,成日得我哋兩個,我同你會講男仔經,仲成日叫你介紹男仔我識,你話如果搵到結婚對象,記得要畀你過目先。

胡:係呀!之前傳你同羅仲謙都會八卦吓,好似真係有啲嘢,不過你話冇咪信你囉,我覺得你幾受男仔歡迎,公司都有個PA幾鍾意你。

黃:唔好意思,我係好多個PA嘅女神。不過你快啲介紹個我識啦!

胡:你呢啲射手座嘅人係好鍾意遊戲人間,唔係好嚮往拍拖。

黃:係鍾意玩,但我鍾意成熟型男士,你話識好多做律師、醫生朋友嘅?

胡:係都留番畀自己啦!

黃:你仲要揀咩?

胡:不過你會hurt仔,玩兩玩就唔要。

黃:我好專一o架!

胡:好啦!有好嘢留畀你。其實我同你有啲似,都係事業型,唔算超級大美女,你可塑性高,見到你好似見到自己咁,你又做師奶、乖乖女、傻妹咁,希望可以再嘗試其他唔同角色,因為同一image好悶,一年拍三、四部差唔多會想死。我睇好你今年攞「飛躍」,《缺宅男女》嘅關二嫂咁犀利,做戲放已經成功咗一半。

黃:點可以再做好啲?

易上難keep

胡:有前輩同我講上位易、keep住難,我都經歷咗好多先行到今日,開始已經有好多機會,去到中間都會有樽頸位,做過好多角色後又開始重複,觀眾開始去挑剔瑕疵,所以你要有心理準備。

黃:我之前兩套劇角色都唔討好,試過畀人人身攻擊,好多負能量。

胡:我都係超級勁負面,大家case唔同,你係因為角色,人哋憎你即係你做得好,但要聽意見再檢討,到你做到話你唔好嘅人都讚你,咁就冇人可以打敗你。

黃:都幾難!我覺得你EQ勁高,但演技唔係逼就出到。

胡:我都經過好幾年先諗通,同埋有劉松仁同陳錦鴻兩個前輩教我好多,所以遇到前輩不妨問多啲。《流金歲月》嗰時太多人讚,自己都會飄飄然,覺得唔係好難啫,但冇人話我知之後條路仲難。

黃:同你傾偈真係獲益良多!

後記:吵耳女人

Mandy、胡杏兒外表斯文,原來兩個女人碰上都可以吵耳非常,訪問期間她倆不時開懷大笑,對話內容還夾雜不少有S尾音的英文,例如「oks」、「hellos」、「byes」等,聽落奇怪,她倆卻講得順口。Mandy自爆這些奇特英文乃她帶頭講起,久而久之更感染了身邊朋友,杏兒便是其一,說到這「鬼主意」,Mandy傻氣地說:「我覺得好得意囉!」

黃: 黃智雯

胡: 胡杏兒

文:影視組

攝影:吳文聰

黃智雯服裝:Ted Baker

髮型:Warden Luk @ IL Colpo

胡杏兒服裝:S.Nine Collection