Paul怕朱茵偷走鎖鏈侍候

Paul年初因「搞大」女友朱茵而遭網友狂插，愛女友心切的Paul為免朱茵出街被傳媒追訪，勸女友留家安胎。適逢前晚Paul舉行演唱會，曾表示有意欣賞男友開騷的朱茵未見蹤影，幸好沒有影響Paul演出心情，吸引數千歌迷撐場，入座率近七成。

返屋企重唱

當Paul獻唱歌曲《孩子》前有感而發說：「送呢首歌畀我未來嘅主人翁。」他又邀得劇集《天與地》兩位主角陳豪及黃德斌任嘉賓，掀起全晚高潮。Paul說：「因為你哋多咗好多師奶入場。」黃德斌笑言：「因為師奶令我踏上紅館唱歌。」並解釋拍檔林保怡因有工作在身而缺席。

朱茵因腹大便便而未能睇男友開騷。（資料圖片）

黃德斌（左）與陳豪（右）擔任表演嘉賓，掀起全晚高潮。

Paul受訪時透露花了一輪唇舌阻止女友到場，他說：「佢嚟會令我分心，又要分散人手照顧佢，返去重新唱一次佢聽。（唔驚佢偷偷哋嚟？）驚o架！所以搵咗條好粗嘅鐵鏈鎖住佢。」

女友隔空撐

Paul坦言戥女友在家待產感辛苦：「佢真係好慘冇得出街，好陰功，女人真係好偉大。」提到演唱會銷情不理想，Paul謂：「唔緊要啦，大家開心。」而朱茵昨午在微博代男友感謝各單位，她寫道：「我雖未能到場……你們都代我撐黃貫中，Yeah！今晚繼續加油。」

文：音樂組