甄子丹百萬名錶冧妻
被喻為宇宙最強的甄子丹是名副其實的愛妻號，說到冧老婆，丹爺直言向來孤寒自己，對太太汪詩詩則闊綽，試過豪送過百萬名錶冧老婆，認真大手筆！還說將所有收入及儲蓄全交太太手中，呻窮話自己冇錢使。
甄子丹前晚單拖出席名錶活動，甫進場被男、女賓客及工作人員爭邀合照，他來者不拒任影唔嬲，同場有女藝員陳倩揚、甘國亮及周美鳳。及後丹爺接受訪問時表示對名錶有研究，亦有不少珍藏，曾豪花逾百萬送鑽錶給太太，會否買百萬名錶獎勵自己？他發揮搞笑本色說：「我自己冇錢買。（所有錢畀晒太太？）係囉……我邊有錢使呀！」
被fans感動
剛自美國回港的丹爺坦言因時差而失眠，但在美國大受歡迎則感受寵若驚：「估唔到咁多人睇我啲戲，由三歲至九十歲都有，有日我搞簽名會，遠遠見到個九十歲婆婆排隊攞我簽名，我即刻畀佢打尖。」面對fans的熱情令他十分感動：「我同太太行街都有人認得，仲問我合照同攞簽名，作為藝人被外界肯定，係有一定鼓勵，我好開心，亦覺得努力冇白費。」
放假陪仔女
對於有指他辭演荷里活大片《轟天猛將2》而被網民狠批他未夠資格打入荷里活，丹爺氣定神閒的說：「係好耐之前嘅事，只係近排又畀人翻炒，我已答過係時間同角色唔合適，有機會下次再合作，總之網友說話唔使理，說話喺人哋度，我只做好自己！」
原來9月丹爺會拍新戲，現在延遲至10月，他解釋要放假陪小朋友：「去邊仲未決定，等太太諗，但唔去得遠，因為要為新戲做準備工夫。」
文：名人組