謝天華向楊怡求婚 百人聲援

無綫藝員謝天華、楊怡、陳敏之、森美、陳志健等前晚到銅鑼灣鬧市拍攝新劇《法網狙擊》。場口講述天華當街向楊怡獻花求婚，其他演員則為她打氣。眾人所到之處均吸引逾百途人包圍，進度一度受阻。鏡頭前無端端多了大量臨記，今次無綫認真有賺！但因整條街塞得水洩不通，期間有警員到場了解。

人多好氣氛

身穿白色西裝的天華行「紅地氈」出場，邊行邊Chok咪嘴唱歌冧楊怡，引得現場途人起哄，猶如恭迎他「登基」一樣。天華笑說：「冇辦法啦，星期五晚吖嘛！不過人多真係好好氣氛。頭先楊怡拒絕我，成個銅鑼灣好似靜晒咁！真實反應真係用錢都買唔到。」

陳敏之（右）與楊怡不擔心場面混亂，因有工作人員保護。	森美化身攝影師不停影相。	陳志健（左）幫手鋪紅地氈。

天華笑言求婚時面紅耳熱，緊張得心肝卜卜跳：「少男情懷返晒嚟呀！都幾得意。」楊怡則指拍這場戲不算最辛苦，卻是最震撼。問到可希望緋聞男友羅仲謙在街頭向她求婚？她笑言正常便可：「做藝人平時都好矚目，求婚唔需要搞咁多花樣。」

近影冇有怕

拍攝期間，楊怡不時被大批街坊包圍，更被一名男粉絲舉機近距離狂影。事後楊怡指對方非臨時演員，但因專心拍戲而沒有被嚇怕：「我同佢都冇接觸到，而且有成隊精英（臨時演員）喺身邊嘛！（眼神令你唔舒服？）我冇理，始終今次鬧市拍戲都幾大場面，要盡快拍完。」

文：影視組