龐錢景逢 甩o靚模愛女強人
龐錢景峰（Andrew）自小與郭秀雲（Sharon）母子關係儼如朋友，Sharon管教兒子方式亦師亦友，甚至不介意兒子被人偷呃拐騙，藉此吸取教訓。現實中Andrew碰過不少壁，被騙財兼攞着數有十幾次之多，感情路上亦曾先後與𡃁模Mia（陳靜儀）和Mika（蕭美卡）甩拖而成為感情輸家，但輸過後，讓他意識到小鳥依人女友不適合他，肯定o靚模不是他那杯茶。
龐錢景峰，不知情者，一定誤以為他是一位太太，隨夫姓龐。其實他原名錢景峰，是郭秀雲與前夫錢小豪所生的兒子，後來加上龐姓是因為尊重繼父龐傑。現年21歲的他，13歲便被送往外國讀書，先後入讀外國的著名學府，他表示自己之所以有今日，全靠繼父支持。
在繼父悉心栽培，以及郭秀雲人生教練督導下，從小Andrew便能放眼世界，除了往外國讀書，2歲起開始學習溜冰，5歲學跆拳，6歲學芭蕾舞，每日放學後，由下午3時至晚上9時，便是密集式上課外活動，對此Andrew卻非常享受：「每樣我都想做專家，世上咁多嘢，學多啲唔拘。」
年紀輕輕的他，曾在花式溜冰獲獎無數，羽毛球亦曾取得英國省份排行17位，芭蕾舞方面是譚圓圓的入室弟子，他擅長洪拳，也擁有跆拳黑帶。但他笑言並非張張刀把把利，自嘲網球和騎馬始終拿它們沒法。
暑期工作多姿多采
仍在學的Andrew，年年暑假都返港做暑期工，性質亦多姿多采，16歲第一份暑期工便在香港蒲點Dragon-i做侍應，之後做過Live Nation搞演唱會，及做event planning；17歲曾當酒店的HR，他對HR工作感到納悶，不過從中他學曉知人善任的道理，知道一間公司喜歡僱用怎麼樣的員工，有自信、不害羞、夠膽的人，經常獲聘用。18歲曾做保良局海外學生仁濟夜的主席，今年則在公關公司任公關。
數最特別一年，是他做兼職模特兒，但試過行騷影雜誌後，知道不適合自己，他說：「Model工作麻麻哋，嗰時都推咗好多job，自知唔係model材料，我得5呎9，唔係6呎3，又冇28吋腰。我客串過電影後，發覺自己唔想入行，娛樂圈嘅錢一啲都唔易賺，好多人想入行，但呢行係最短命嘅工作，得幾年時間興奮，好多女仔入行幾年後就冇晒消息，有幾多個周潤發？甄子丹都捱咗好多年。」他亦表明冇興趣跟繼父學做鋼鐵生意，究竟他將來想做甚麼？他說想做一些對社會有貢獻的工作，並故作神秘，透露8月份便會推出一個大項目。
好過40歲至被人呃
他說：「媽咪想我乜都經歷吓，想我拍多幾次拖，想我被人呃吓，我覺得佢教精我，20歲被人呃，好過40歲先被人呃。（20歲前闖過禍？）我被人呃過十幾次，幫人做擔保、呃我去買嘢買紅酒、呃我攞着數，啲人知我識娛樂圈中人，於是搵我去識人，之後同人哋講我都有份參與佢個活動，嗰時識咗啲唔應該識嘅朋友。（被人呃好傷心？）冇傷心，我有幾多錢被人呃？咪萬幾兩萬蚊。」
披露同Mia分手原因
至於感情上，曾先後與兩位o靚模Mia和Mika拍過拖，最終亦甩拖收場，他說：「我同Mia和Mika一齊時，佢哋都未係model，同Mika分手成年先做模特兒。」他更首次披露與Mia分手因由：「嗰時佢想選8模，我唔能夠接受，其實o靚模喺外國都有，我認為Kate Moss先係真model，唔可以同香港啲𡃁模相提並論。」他續說：「我覺得周潤發、李小龍係偶像，fans會當佢哋係神，o靚模只係宅男女神。」
他不諱言媽咪當初知道他拍拖時，也大感愕然，但從不加意見，反而戀情告終，他明白到小鳥依人並不適合他，問他究竟喜歡哪類型女孩？他說：「我鍾意有氣質嘅女仔，唔一定要靚，我鍾意女強人，未來都係被老婆玩殘o架啦，邊個男人唔被女人恰？自己鍾意有腦嘅女人。」而拍拖一年多的現任女友Erica正是他口中喜歡的類型，兩人的相處是互相給予空間，Andrew說自己雖然喜歡玩，但感情專一，從未試過一腳踏兩船。
生父錢小豪好老竇
但他反而聽聞過生父錢小豪的風流史，在他心目中，生父靚仔、有型、百厭、又識功夫，甚具吸引力，現在錢小豪已再組織家庭，並有同父異母的9歲細佬。他與錢小豪的關係一向良好，兩父子每星期都會見面，會一起踏單車、游水和上拳館打拳，他不諱言錢小豪是好老竇，他說喜歡父親錢小豪，也喜歡母親郭秀雲和繼父龐傑。
Profile
姓名：龐錢景峰/龐景峰
英文名：Andrew
出生日期：8月29日
年齡：21歲
學歷：現就讀加州大學洛杉磯分校（University of California,Los Angeles）Business Management Year 3
採訪：梁翠儀
攝影：黃叔榮
場地：W Hotel