周海媚解宇心結 有緣再咀

周：大宇，跟你合作過三套劇《縱橫四海》、《縱橫天下》及《影城大亨》之後，都未有再合作，之後我去咗北京發展，2008年喺上海出席你嘅生日會，之後商演都遇上兩次，雖然碰面唔多，但今次我哋坐埋傾偈，你畀我感覺依然冇變！

陶：嗰次我喺上海拍劇，你又咁啱喺附近，好多謝你到賀，不過，我哋總係欠點緣分，雖然拍咗三套劇，但我同你之間嘅關係太撲朔迷離，你簡直令我「變態」！

周：吓……點解咁嚴重？

陶：當年拍《四海》，你拍咗大半部戲後因為病而休息，留番你嘅替身同我做戲，劇情寫我狂追你，用詞情深款款，但你嘅替身完全唔知發生咩事，又冇演戲經驗，談情戲惟有全程「食自己」，即係自己同自己演，最好笑我對住替身講好愛你，佢就回我12345，哈哈，問你死未！最慘係我明明有機會同你拍咀戲，我卻要將一個唔係周海媚嘅替身幻想為周海媚，咁你話我仲唔係變態？

海味已簽了新經理人公司，將會陸續接新Job。	海味與大宇雖然見面不多，但坐埋有說不完的話題。	大宇希望與海味再續未了緣。

冇患紅斑狼瘡症

周：當年我身體唔舒服，但唔係患「紅斑狼瘡症」，只係天生血小板低，輕微碰撞都好易瘀，我最近都撞親個頭，啲瘀血好耐都唔散，好彩唔使開工，既然依家聽你咁講，即係話我欠你一場咀戲啦，哈哈！

陶：又唔係咁講，嗰時你唔舒服我哋都好擔心，到拍《天下》時，我以為有機會同你再續未了緣，點知今次個劇你係做我阿媽！當日喺化妝間見到你化老妝，嚇得我，我仲記得好愕然咁問「你喺度做乜嘢呀」？我真係接受唔到囉！

周：哈哈哈哈，我覺得係王晶（《天下》監製）玩你囉！

陶：直到拍《影城》，我仲有期盼，演電影公司老闆應該有機會親近旗下花旦，點知因為角色關係，我演一名好有地位嘅老闆，面對旗下女演員，只抱一種提攜後輩嘅態度，好似做你老竇咁，細姪女冇得咀！

演阿媽角色夠勇

周：我個角色係好仰慕你喎，但你又唔喜歡我，我哋關係只係有點曖昧，難怪你會咁變態！我相信我哋總有機會再合作，今年七月一日，我簽咗新經理人公司「星美國際」，嚟緊會有好多新嘅發展，到時我哋認認真真「行埋」（合作），一定有機會還番畀你（咀戲）！

陶：演《天下》時我好佩服你，一般女星唔會咁冒險接「阿媽」角色，我好記得你當時同我講係特登接嘅，想挑戰呢個角色，我覺得你好有性格、好勇敢！

周：因為我覺得角色寫得好好，劇中有好多「Flash Back」場面，我同松哥（劉松仁）談情，劇本好，寫我失憶變番一個細路仔嘅性格，我好想演，所以唔介意接，當時我拎住自己阿媽張相不停諗點樣先可以變老。

拍拖十年 和男友似夫妻

陶：你真係唔需要擔心老，保養得好好，我仲聽聞你蜜運中？

周：其實我拍咗拖十年，男友比我年輕十年，佢做建築，係朋友介紹認識，起初男友好抗拒我做呢行，講真，頭兩、三年為咗拍拖，我推咗好多Job，搵錢的確重要，但我嘅人生唔可以不停為了搵錢，唔想逼自己咁辛苦。講到結婚，男友頭幾年已向我求婚，但我真係唔急，唔想放低演藝工作，我哋關係好穩定，已經同夫妻冇分別，只係欠一紙婚書，遲啲可能突然想結咪結囉，好隨意，不過會低調唔需要大搞，因為我拍結婚戲太多，古今中外嘅婚紗都着過好多次！

素顏行街冇問題

陶：北京已經係你嘅「新天地」，今次返香港又為乜呢？

周：早前拍電影《楊門女將》好辛苦，喺內蒙零下三十幾度好凍，拍個武打鏡頭，吊威吔360度轉落地仲被劈咗刀，隻腳都腫晒！我都唔知點捱過嚟，真係要抖吓，工作咗兩年幾都未休息過，趁休息返嚟探吓屋企人。香港同北京生活係唔同，但我喺香港都會好悠閒周圍行街、食雪糕，記者影我搭港鐵、食雪糕，冇所謂嘅，咪影囉！我平日上街都唔愛化妝，又唔覺有問題喎，只要企企理理唔影響巿容就得，我仲會喺街邊拮魚蛋添！

陶：好欣賞你不拘小節嘅性格，唔怪得你keep住年輕，好似食咗防腐劑！

周：其實我個樣cool咋，識我嘅人笑死，唔識嘅就嚇死！試過返公司化妝，梳頭啲阿姐幫我整頭都好驚，又跌髮夾又跌梳，有時我拍外景，化妝阿姐話叫我補妝，我都話唔使啦，好靚啦！

陶：我諗每個演員都有一種氣質，而你嘅氣質來自你嘅自信！

後記：

在陶大宇的四篇訪問中，他最關心是受訪嘉賓的需要，先是擔心會否阻礙郭可盈照顧女兒的考試，而歐陽震華和駱應鈞的衣着配搭又是否平均，與黎耀祥訪談時興起飲紅酒會否影響其駕駛安全；最後得悉周海媚撞傷頭令到面有瘀痕，又怕她影相不靚，一度延遲遷就。大宇對朋友的心細如塵，難怪一班老友對他讚口不絕，邀約訪談冇托手o架。

周： 周海媚　陶： 陶大宇

文：影視組

攝：司徒國榮