34D咪神梁政珏 向後輩晒料
無綫新一代「咪神」梁政珏早前因家事停工半年，近日逐步開始復工，她最期待盡快入劇組挑戰新角色，擁有34D豐胸的她亦不介意行性感泳衣騷，笑言要留起靚相向後代Show Off自己後生時樣靚身材正！
與高海寧同樣獲封為無綫新一代「咪神」的梁政珏，早前因為母親生病而停工半年侍候左右，現其母已康復，她逐步展開其復工計劃。除了亮相各大小商場騷，日前她亦聯同莊思敏、翟威廉及羅泳嫻等藝員為廣州長隆水上樂園拍攝特輯，當然不乏着泳衣盡騷34D豐胸，她坦言不介意行泳衣騷：「着出嚟靚就得，每個人都有性感一面，女仔應該趁後生着得靚啲！老咗可以畀仔女睇番，就好似我婆婆以前喺上海做記者，佢都有畀佢啲文章我睇。」
正當人人都嚷着要減肥瘦身時，梁政珏卻大唱反調想增肥，笑言想打肥塊面，又喪食無停口：「早排睇波，我開場前食咗個印尼炒飯，睇緊波嘅時候又食雞翼同洋葱圈，睇完再食公仔麵加蛋！」她認為谷肥一點會更上鏡。
想挑戰演潑婦
已有一段時間無拍劇的梁政珏直言想演一些特別的角色，尤其想演潑婦，她記得演潑婦演到出神入化的關菊英講過鬧人的戲份最難演：「因為啲台詞要記得好熟，要令到個人勁火勁慶，鬧嘅時候又唔可以窒，其實好考工夫！」
服裝及場地：TWIST
攝：黃叔榮
文：專案組